Astana – Atyraý jáne Astana – Qyzylorda: Stadler vagondarynyń kelesi baǵyttary belgili boldy
ASTANA. KAZINFORM - Jyl sońyna deıin Qazaqstanda Stadler vagondarynan jasaqtalǵan poıyzdardy taǵy eki baǵytta iske qosý josparlanyp otyr. Bul týraly «Qazaqstan temir joly» ulttyq kompanııasy basqarma tóraǵasynyń orynbasary Ánýar Ahmetjanov aıtty.
«Qazaqstan temir joly» ulttyq kompanııasy basqarma tóraǵasynyń orynbasary Ánýar Ahmetjanovtyń aıtýynsha, aldaǵy ýaqytta Stadler vagondarymen qatynaıtyn poıyzdardyń baǵyttaryn kezeń-kezeńimen keńeıtý josparlanyp otyr.
– Qarasha aıynyń sońyna deıin jańa vagondar Astana – Atyraý baǵytyna shyǵýy múmkin. Al jyl sońyna qaraı, shamamen jeltoqsannyń ortasynda poıyzdardyń jańa qozǵalys kestesi engizilgen kezde, «Nurly jol» vokzalynan Jezqazǵan arqyly Qyzylordaǵa qatynaıtyn poıyzdy da iske qosýdy josparlap otyrmyz, - dedi Ánýar Ahmetjanov.
Budan bólek, 13 qarashada Stadler vagondarynan jasaqtalǵan poıyz «Nurly jol – Semeı» baǵyty boıynsha alǵashqy saparyna attanady.
Jalpy, búginde «Jolaýshylar tasymaly» AQ 100-den astam Stadler vagonyn qabyldaǵan. Kelisimshartqa sáıkes, 2030 jyldyń sońyna deıin Qazaqstanda shyǵarylǵan 557 jolaýshylar vagony kezeń-kezeńimen jetkiziledi. Olardyń qyzmet etý merzimi 40 jyldy quraıdy. Sondaı-aq kelisimshart aıasynda vagondarǵa 20 jyl boıy tehnıkalyq qyzmet kórsetý kózdelgen.
Aıta keteıik, 11 qarashada Qazaqstanda shyǵarylǵan Stadler vagondarynan jasaqtalǵan alǵashqy jolaýshylar poıyzy Astana – Almaty baǵytyna jolǵa shyqqany habarlandy.
