Astana ataýyn ózgertýde konstıtýtsııalyq quqyq buzylǵan joq - sarapshy
Onyń aıtýynsha, elorda ataýyn ózgertý jumystary Konstıtýtsııa talaptaryna sáıkes júrgizildi.
«Elordamyz - Astananyń «Nur-Sultan» dep atalýyna Qazaqstan Respýblıkasynyń azamaty retinde óte rızamyn. Al endi zańger retinde qarastyrar bolsaq, Zań jobasy Úkimetten kelip, Prezıdentke tústi. Prezıdent Konstıtýtsııanyń 91-babyna súıenip, Úkimettiń zań jobasyn Konstıtýtsııaǵa sáıkes keletini-kelmeıtini týraly másele kóterdi. Konstıtýtsııanyń 91-babynyń 2-tarmaǵynda ózgermeıtin, ózgertýge bolmaıtyn qundylyqtarymyz kórsetilgen: ıaǵnı memleketimizdiń táýelsizdigin, respýblıkamyzdyń aýmaqtyq tutastyǵyn, memleketimizdiń basqarý nyshanyn, Táýelsiz Qazaqstannyń negizin salýshy Tuńǵysh Prezıdent - Elbasy qalap bergen respýblıka qyzmetiniń túbegeıli prıntsıpterin jáne Elbasy mártebesin ózgertýge bolmaıdy. Sondyqtan, Konstıtýtsııalyq Keńes Úkimetten kelip túsken zań jobasyn osy normaǵa sáıkes nemese sáıkes emestigin qarap, oń tujyrym berdi», - dep atap ótti ol QazAqparat tilshisine bergen suhbatynda.
Konstıtýtsııalyq Keńes tujyrymyn alǵan soń, Prezıdent ókilettigin qabyldaǵan tulǵa Konstıtýtsııa talaptary negizinde respýblıkalyq referendým nemese Parlament qaraýyna berý arqyly ózgertý men tolyqtyrýlar engizýdi qarastyrady.
«Bizdiń jaǵdaıda Prezıdent Parlamenttiń qaraýy týraly uıǵarym jasady. Sondyqtan, Zań jobasy Parlamentke kelip tústi. Sondyqtan, el astanasynyń ataýyn ózgertýde konstıtýtsııalyq quqyq esh buzylǵan joq», - dedi Ýnzıla Shapaq.
Konstıtýttsııalyq keńes múshesi qalalarǵa tulǵalardyń esimin berýdiń álemdik praktıka ekenin eske saldy.
«Memleketimizdi beıbit, azamattyq qoǵamdy qurýymyzǵa, barlyq adamdardyń laıyqty ómir súrýine, onyń halyqaralyq arenada bedeldi bolýyna jaýapkershilikti moınyna alyp, óziniń úlesin qosqan - Elbasy Nursultan Ábishuly Nazarbaev. Álemde onǵa jýyq memlekettiń ataýy - tarıhı tulǵalardyń esimine berilgen. Odan bólek, tulǵalardyń esimi berilgen qalalar bar. Biz esh jańalyq jasap otyrǵan joqpyz. QR azamaty retinde Elbasyna degen qurmetim óte zor», - dedi Ýnzıla Shapaq.
Eske sala ketsek, 20 naýryzda Prezıdent mindetin ýaqytsha atqarýǵa kirisken Qasym-Jomart Toqaev Astana qalasynyń ataýyn Nursultan dep ózgertýdi usyndy.
