Astana ataýyn áýejaıdan kele jatqanda talqyladyq - elordanyń alǵashqy ákimi

«Halyqaralyq tusaýkeserden bir aı buryn Astana óziniń jańa ataýyn ıelendi. Tarıhı ataý - Aqmola -jergilikti jerdiń sakraldy mánin, qasıettiligin aıshyqtaıtyn. Alaıda bizdiń tarıhymyzben jete tanys emes adamdar, álde, jańa astanany synaý úshin ádeıi synyqqa syltaý izdeýshiler, onyń ataýynyń túrli jaǵymsyz túsindirmelerin oıdan sh­y­ǵar­­dy. Qoǵamda, gazet betterinde bul tur­ǵyda qyzý pikirtalas týdy. Bul týraly, árıne qoǵamdyq pikirge únemi den qoıyp otyratyn Memleket basshysy da bildi», - dep jazdy Ádilbek Jaqsybekov «Egemen Qazaqstan» gazetinde jarııalanǵan «Astana - Qazaqstan táýelsizdiginiń nyshany» maqalasynda.

Ol Nursultan Nazarbaevtyń ár mınýtty tıimdi paıdalanatynyn atap ótti.

«Jumys máselesin talqylaý Memleket basshysyn jıi kútip alatyn áýejaıda bastalatyn da, qalaǵa jol ústinde jalǵasatyn. Qandaı da bir salynyp jatqan nysanǵa jolaı soǵa ketý jıi bolyp turatyn. Bir kúni biz Prezıdentti el aralap kele jatqan betinen kútip aldyq. Tike­leı áýejaıda ol Premer-Mınıstr Nurlan Balǵymbaev ekeýmizdi óz mashına­syna otyrǵyzyp aldy. Astananyń ataýyn ózger­tý shyn máninde pisip-jetil­di, - dep áńgi­meni birden bastady Memleket basshy­sy. Óńirlerdegi kez­desý barysynda kóptegen adamdar osy týraly áńgimelep, suraqtar qoıdy. Pre­zıdent az-kem únsiz qaldy da, jartylaı suraýly túrde «Astana» degen ataý siz­der­ge qalaı, unaı ma dedi. Teginde bul ózi qanatty sóz, bolashaqqa umtylystyń nysha­ny bolar ma edi. Memleket basshysynyń suraǵy bizdi, ádettegideı, ábigerge saldy. Prezıdent oılanyp-tolǵanýǵa ýaqyt bergen jáne  kóp ótpeı-aq áńgime qaıta jalǵasyn tapty», - dep eske aldy Jaqsybekov.

Nursultan Ábishuly «Astana» úshin senimdi ýájder keltirgen: bul sóz­de barshaǵa málim naqty maǵyna bar jáne dálme-dál astanany bildiredi; ekinshiden, onda jaǵymsyz saıası nemese tarıhı bura túsindirýge negiz joq; úshin­shiden, ol qazaq tilinde de, basqa tilderde de áýezdi, jaǵymdy estiledi. Aqyr sońynda, halyqaralyq tanystyrylymda usynylatyn jańa ataý eldiń jańarýynyń nyshanyna aınaldy. Qazaqstan astanasy bas qalalardyń álemdik tizimine jańa ataýmen endi.

«Nursultan Ábishuly qalany qaıta ataý týraly sheshim zań boıynsha tek máslıhat pikiri eskerile otyryp qana qabyldanýy múmkin ekenin birden-aq aıtty da, meniń depýtattarmen kez­de­sýi­mdi surady. 1998 jylǵy 6 mamyrda astanalyq más­lıhattyń sessııasy shaqyryldy. De­pý­tattar Memleket basshysynyń usy­nysyn qyzý qoldady. Kóptegen adamdar munyń durys ári der kezinde qabyl­danǵan sheshim ekenin aıtty. Elorda Astana degen jańa ataýǵa ıe boldy», - dep óz sózin túıindedi Ádilbek Jaqsybekov.

Sondaı-aq, bul maqalada Ádilbek Jaqsybekov bıznesten memlekettik qyzmetke qalaı aýysqanyn da jazǵan edi.