Astana aspanyndaǵy kepteliske baılanysty ushý kestesi ózgerdi

ASTANA. KAZINFORM — Astana halyqaralyq áýejaıyndaǵy jaǵdaıǵa baılanysty áýe kompanııalary jolaýshylarǵa eskertý jasady. 

«Qurmetti jolaýshylar, Nursultan Nazarbaev halyqaralyq áýejaıy áýe keńistiginde qatynastyń kóptigine baılanysty 2-4 shilde aralyǵynda áýekompanııanyń ushý kestesine ózgerister engiziletinin habarlaımyz. Ushý kestesi ózgergen jaǵdaıda jolaýshylar bılet satyp alý kezinde kórsetilgen nómirler boıynsha habarlama alady. Ushyp shyǵatyn jolaýshylarǵa qaýipsizdik tekserisinen jáne tirkeý protsedýralarynan ótý úshin áýejaıǵa aldyn ala kelýge keńes beremiz. Qolaısyzdyq úshin keshirim suraımyz» delingen FlyArystan kompanııasy taratqan eskertýde.

Dál osyndaı habarlandyrýdy ózge kompanııalar da taratty.

SCAT, Qazaq Air jáne Air Astana 2-4 shilde aralyǵynda Astana áýe keńistiginde qatynastyń kóptigine baılanysty áýekompanııanyń ushý kestesi ózgeretinin habarlady. 

«Reıs mártebesin saıtymyzda nemese Air Astana mobıldi qosymshasynda tekserip otyrýyńyzdy suraımyz. Tekseristen ótip, ýaqtyly tirkelý úshin jolaýshylarǵa áýejaıǵa aldyn ala kelý kerek» deıdi Air Astana kompanııasynan.   

Aıta keteıik, qazir Astana halyqaralyq áýejaıynyń ushý-qoný jolaǵynda jóndeý jumysy júrip jatyr.