«Astana arýynyń» fınalyna ótken 20 qyz beınelengen kúntizbe jaryqqa shyǵady
ASTANA. QazAqparat - «Astana arýy» baıqaýy óziniń 20 jyldyq mereıtoıyna oraı, bıyl fınalǵa shyqqan 20 arýdyń sýreti jarııalanǵan tanystyrylym kúntizbesin shyǵarady, dep habarlaıdy QazAqparat baıqaý uıymdastyrýshylaryna silteme jasap.
Astananyń arý qyzdaryna fotosessııa jasaǵan - ataqty Fashion-fotograf Mareta Kelıgova. Onyń týyndylary óz isiniń has sheberi, áıgili Maksım Zolotýhınniń týyndylarymen úılesim tapqan. Astananyń kórikti jerlerin kózdiń jaýyn alatyndaı etip túsirgen onyń sýretteri jobaǵa sán berdi.
Kúntizbeden qalanyń ásem kórinisterin tamashalap, sondaı-aq Astananyń aıdaı sulý arýlary týraly tolyq málimet alýǵa bolady.
Kúntizbeniń muqabasynda «Astana arýy-2018» mereıtoıly baıqaýynyń jeńimpazy Erkenaz Seıfýlla beınelengen. Erkenaz 2017 jyly daryndy balalarǵa arnalǵan «Zerde» mektebin támamdaǵan. Qazaq tehnologııa jáne bıznes ýnıversıtetinde bilim alyp jatyr, bolashaq dızaıner retinde óziniń kıim-keshek jelisin jasaýdy armandaıdy.
