«Astana arýy – 2023» jeńimpazy anyqtaldy
Elordada «Astana arýy – 2023» sulýlyq baıqaýy óz máresine jetti. Elordanyń basty sulýy ataǵyn 23 jastaǵy Karına Birimjanova jeńip aldy, dep habarlaıdy Kazinform agenttiginiń tilshisi.
«Astana arýy» ataný úshin aqpan aıynan beri kastıng ótkizilip, myńnan astam boıjetken iriktelgen edi. Aqtyq saıysqa aqylyna kórki saı tek 17 arý ótti.
Karına Birimjanova 2019 jyly Italııanyń Pıza qalasynda Foundation in Science baǵdarlamasy boıynsha oqyǵan, Malaızııada aǵylshyn tilinde psıhologııa salasynda bakalavr dárejesin aıaqtaǵan. Qazir ol grafıkalyq dızaın boıynsha bilim alýdy jalǵastyrýda, áleýmettik jelidegi blogyn belsendi júrgizip, sángerlik bıznespen aınalysady.
Tıisinshe, birinshi vıtse-mıss ataǵyn Anna Zorına aldy, ekinshi vıtse-mıss – Bınur Janbolatova, úshinshi vıtse-mıss – Natalıa Pavlıshına boldy.
Sulýlyq baıqaýynyń úmitkerlerin «Qazaqstan arýy» baıqaýynyń prezıdenti Aıdaı Isaeva, «Qazaqstan arýy-2022» ataǵynyń ıegeri Tomırıs Kákimova, telejúrgizýshi Juldyz Ábdikárimova, Qazaqstannyń eńbek sińirgen qaıratkeri Svetlana Aıtbaeva jáne basqalary baǵalady.
Buǵan deıin Kazinform tilshisi baıqaý úmitkerlerimen suhbattasyp, sulýlyq uǵymyn qalaı túsinetinin jáne saıysqa daıyndyq qalaı ótip jatqanyn suraǵan edi.
«Qazaqstan arýy» baıqaýy 7 jeltoqsanda Almatyda ótedi. Onda elimizdiń barlyq óńirinen iriktelip shyqqan has sulýlar 5 mln teńge júlde men «Álem arýy» baıqaýyna joldama úshin baq synaıdy.
