Astana ártisteri medıtsınalyq mekemelerdi aralap, balalardyń kóńilin kóterýde
ASTANA. QazAqparat - Astanada Qala kúni merekesine oraı «Astana ıgiligi úshin!» jobasy aıasynda medıtsınalyq-áleýmettik mekemelerde «Balalarǵa kúlki syıla» aktsııasy ótýde.
Bul týraly Astana qalasynyń 16 jyldyǵyna arnalǵan merekelik sharalardy daıyndaý jáne ótkizý jónindegi uıymdastyrý komıtetiniń medıa-shtabynan habarlady. M.Gorkıı atyndaǵy orys drama teatry, Astana qalasy qýyrshaq teatry, «Jastar» teatry, Astanalyq tsırk ártisteri túrli-tústi bezendirilgen avtobýsqa minip, medıtsınalyq-áleýmettik mekemelerdi aralap júr. Balalar kóńildi kólikpen Shattyq eline saıahat jasaýǵa shaqyratyn sulý perızatpen tanysady. Sonan keıin «Vseznaıkamen» birge túrli saýaldarǵa jaýap izdep, «Tsırkovaıa» beketinde jongler men sıqyrshylardyń ónerin tamashalaýda. Sońynan kók aspanǵa juldyz sharlar jiberiledi. Bul juldyzdardyń ereksheligi - oǵan balalar asyl arman-tilekterin jazady. Ártister merekelik sharaǵa qatysa almaıtyn syrqaty aýyr balalardyń bólmelerine arnaıy baryp syılyqtaryn úlestiretin bolady. Uıymdastyrýshylardyń aıtýynsha, «Balalarǵa kúlki syıla» jobasy balalardyń júregine jylýlyq syılaıtyn erekshe áserli ári jarqyn kórinis bolmaq.
