Astana Art Show: Qazaq jastary qazirgi zaman ónerin kórsetti
ASTANA. QazAqparat - Astanadaǵy TSE Art Destination galereıasynda «Astana Art Show 2018» halyqaralyq kórmesi ashyldy. Qazirgi zaman ónerine arnalǵan shara alǵash ret uıymdastyrylyp otyr. Oǵan shetelde júrgen ónerli qazaq jastary da óz týyndylaryn alyp keldi, dep xabarlaıdy QazAqparat tilshisi.
«Astana Art Show» jobasy úsh kórmeden turady. Búgingi kórmeniń taqyryby - Metamorfozalar. Negizgi maqsat - jas sýretshilerdiń ishki kóńil-kúıin kórsetý. Olardyń dúnıetanymyn, evolıýtsııasyn, ishki metamorfozasyn, shyǵarmashylyq shabyttaryn bir sáttik sýret arqyly kórýge bolady. Kórmege óz jumystaryn ákelgenderdiń ishinde shetelde tanymal bolǵan qazaqstandyq sýretshiler de bar. Máselen, Londonda aty shyqqan Aza Shádenova óz týyndylaryn alyp keldi. Al jas sýretshi Ádil Áýbekerov jańa art-nysanyn kórsetedi.
Merýert pen Baqtııar da Londonda turady. Olar shyǵarmashylyq dýetpen óner kórsetedi. Laqap attary - Mika & Berkin.
«Biz shetelde talaı art-kórmelerde boldyq. Astanadaǵy kórme odan esh kem emes. Búgingi sharaǵa biraz adamdar keldi. Demek, jastar tarapynan qyzyǵýshylyq bar. Ónerli sýretshiler de az emes. Soǵan shyn júrekten qýanyshtymyz», - deıdi Merýert Orynbasarova.
Kórmege tanymal japondyq fotograf Ikýrý Kývadjımanyń «Men Oblomov» avtoportreti de shyǵaryldy. Jalpy, TSE Art Destination galereıasynyń ishinde de, syrtynda da qazirgi zaman ónerine arnalǵan san alýan týyndylarmen tanysýǵa bolady. Sonyń ishinde fotosýretter, portretter, kollajdar, ınstallıatsııalar men qolóner buıymdary bar.
Shymkent qalasynan kelgen Syrlybek Bekbotaevtyń ınstallıatsııasyn da erekshe atap ótken jón. Ulttyq kıim kıgen qazaq qyzynyń beınesi birneshe bólikten turady jáne saǵatyń ishki mexanızmi sııaqty únemi aınalyp otyrady. Onyń beınesi keıde túsiniksiz bolyp ketedi. Al bir-eki aınalymnan keıin qaıtadan óziniń tutas qalpyna keledi. S.Bekbotaevtyń aıtýynsha, bul - qazirgi ómirdiń kórinisi. Qansha ýaqyt ótse de, kez kelgen jańalyq eskiniń jańǵyryǵy ispetti. Bir-eki aınalymnan keıin qaıtadan burynǵy qalpyna, ulttyq bolmysyna keledi.
«Sosyn bul ıntallıatsııany shyǵarmyshylyq shabyt dep túsinýge de bolady. Biz bir nárseni qalaı aınaldyrsaq ta, jańalyqty ótken ómirden alamyz, tarıxtan nár alamyz», - deıdi S.Bekbotaev.
Aıta keteıik, Astana Art Show aıasyndaǵy ekinshi kórmeniń taqyryby -«Qaıta júkteý. Keńistikti ońtaılandyrý». Oǵan Qazaqstan men Ortalyq Azııanyń jas sýretshileri qatysady. Al úshinshi kórme qaıtadan TSE Art Destination galereıasynda ashylady.
