Astana Art Fest festıvali: Jurtshylyqty qyzyqtyrǵan týyndylar
Atap aıtqanda, qala kúni aıasynda 6-8 shilde aralyǵynda bul mádenı shara mazmundy baǵdarlamamen erekshelenbek.
Festıvaldiń bas kýratory, «Treýgolnık» kýratorlyq sheberhanasynyń qatysýshysy (Máskeý) ıAna Malınovskaıanyń aıtýynsha, aǵymdaǵy jyly ashyq baıqaý ótkizilip, qatysýshylar sany eki esege artty. Týyndylar negizinen kóshpeli mádenıettiń qundylyqtaryn nazarǵa alyp jasaldy.
«Ashyq baıqaýǵa 168 ótinim tirkelip, onyń ishinde 10 elden 70-ke tarta qatysýshy shaqyrtyldy. Elordadaǵy «Nurjol» jelekjolynda kópshiliktiń nazaryna usynylǵan árbir týynda erekshe ári qyzyqty dep aıta alamyn. Osyndaǵy sýretshiler men músinshiler ekologııa men áleýmettik taqyryptarǵa mán berdi. Bıyl festıvalge qatysatyn elderdiń sany artty. Osy oraıda búgin frantsýzdyq jáne jopondyq ónerpazdardyń týyndylary kópshiliktiń qyzyǵýshylyǵyn týdyryp jatyr»,-dedi Malınovskaıa.
Budan bólek, ol jaqynda elorda turǵyndarynyń narazylyǵyn týdyrǵan álemge tanymal ıspandyq «Lıýtsenteraptýs» art-tobynyń jumysyna túsinik bildirdi. Esterińizge sala keteıik, «Astana ArtFest» zamanaýı óner festıvaliniń komandasy álemge tanymal «Lıýtsenteraptýs» art-tobymen birlesip, erekshe óner ınstallıatsııasyn jasaǵan bolatyn. Atap aıtqanda, sýburqaqtardyń birin bos plastık bótelkelermen toltyrǵan edi. Biraq, avtorlardyń bul oıyn elorda turǵyndary túsinbedi.
«Bul art-top plastıkpen jumys isteýde. Olar «Nurjol» jelekjolyndaǵy sýburqaqtardyń birin bos plastık bótelkelermen toltyrdy. Kúndiz bul bótelkeler kórinisinen aıtarlyqtaı áser bolmasa da, túnde basqasha kórinis baıqalady. Art-top óz ıdeıasynda ekologııalyq máselelerge mán berýde. Búginde muhıttar osy plastıkalyq bótelkelermen lastanyp jatqany belgili, osyndaı qoqystar tutas qurlyqqa aınalyp jatyr. Saıahatshylar taý bolyp úıilip jatqan plastıkalyq bótelkelerge tap bolýda»,-dedi bas kýrator.
Búgin elorda turǵyndary men qonaqtarynyń qyzyǵýshylyǵyn týdyrǵan týyndylardyń biri japondyq sáýletshi Shın Shokıtaǵa tıesili. «Osyndaǵy kóshpeli mádenıettiń qundylyqtaryn eskere otyryp, kıiz úı túrinde avtobýs aıaldamasyn qurastyrdym. Degenmen kıiz úı aǵashtan jasalatyny belgili, alaıda qazirgi zamanǵy talaptardy nazarǵa alyp, týyndyny temirden qurastyrdym»,-deıdi Shokıta.
Al Arystanbek Shalbaevtyń konstrýktsııasy «Sandyq» dep atalady. Avtor bul týyndyda sandyq kóshpeliler úshin mańyzdy zattardyń biri bolǵanyn, alaıda «zamanaýı «kóshpeliler» úshin qandaı zat baǵaly?» degen saýaldy qoıyp otyr.
Munymen qosa, Gúlmıra Tátibaevanyń «Great halat» týyndysynda ózindik erekshelik bar. Installıatsııa metall qańqadan jáne áıelderdiń eski halattary men shapandarynan, bas oramaldarynan qurastyrylǵan. «Sýretshiniń ıdeıasynda buryndary kıiz úıler ózindik mádenı ortalyq bolǵanyn negizge alǵan. Kóshpeli ómirde áıelder qundylyqtardy saqtaýshy rólin atqardy. Avtor qazirgi zamanǵy názik jandylarda osyndaı maqsat-mindetter joq ekenin, áıelderdiń máselelerin búginde saýda korporatsııalary sheship jatqanyn meńzeıdi»,-dep túsindirdi uıymdastyrýshylar.
Taǵy erekshe ınstallıatsııanyń biri frantsýzdyq Lamın M esimdi ónerpaz jasady. Onyń ıdeıasy «Shekarasyz kóshi-qon» dep atalady. Eski terezeler men esikterden qurastyrylǵan lashyq úı zańsyz kóshi-qon máselesin kóterip otyr. Jobanyń negizinde adamdardyń nemquraılylyǵy, bekinister jasaýǵa qumartýy sekildi taqyryptar qozǵalǵan.
«Álemdegi májbúrli kóshi-qon protsesin eskere otyryp, «adamdar bir-biriniń aldynda osylaı esikti japqany durys pa?» degen saýalǵa ekpin qoıdym. Osy oraıda adamgershilik qundylyqtardy únemi nazarda ustaǵanymyz abzal»,-deıdi Lamın M.
«Astana Art Fest» xalyqaralyq óner festıvali aıasynda alyp kıiz úı salyndy. Alyp kıiz úıdiń irgesi qurylys materıaldaryn kóterýge arnalǵan aǵash konstrýktsııalardan (poddon) qalanýda. Ádette ondaı konstrýktsııa qurylysta paıdalanylady, oǵan kirpishter tıelip, joǵary qabattarǵa jetkiziledi. Al «Astana Art Fest» festıvaliniń qatysýshylary qurylys salasynyń osy bir materıalyn kádege jaratyp, proektsııalyq kınoteatrdy qurastyryp shyǵýǵa bel býǵan. Jospar boıynsha, alyp kıiz úıdiń tóbesi jabylǵannan keıin tóbege úlken proektsııalyq ekran ornatylady. Al pavılonnyń ishine kirgen adamdar jerge jatyp, fılm kóre alady.
