Astana Art Fest-2016 festıvali halyqtyń kóńilinen shyqty - Á.Nurpeıisov
ASTANA. QazAqparat - Aǵymdaǵy jyly elorda kúnine oraı ekinshi ret ótkizilgen Astana Art Fest-2016 festıvali halyqtyń kóńilinen shyqty. Bul pikirdi búgin Ortalyq kommýnıkatsııalar qyzmetindegi brıfıngte «Astana jastary» jastar resýrstyq ortalyǵynyń basshysy Ánýar Nurpeıisov bildirdi.
«Bıyl 4-6 shilde aralyǵynda zamanaýı óner, sáýlet, dızaın, ónerkásiptik dızaın, mýzyka jáne teatr ónerlerin biriktiretin Astana Art Fest-2016 festıvali ótti. Bul joba tolyǵymen Astana qalasy ákimdiginiń qoldaýymen uıymdastyryldy. Aǵymdaǵy jylǵy festıval taqyryby «Adam energııasy» dep ataldy. ıAǵnı, bizdiń sýretshilerimiz, sáýletshilerimiz osy taqyrypqa oraı ózderiniń týyndylaryn kórsetti», - dedi ol.
Ortalyq basshysynyń atap ótýinshe, aǵymdaǵy jyldyń qańtar aıynda festıvaldiń uıymdastyrý komıteti úlken saıys jarııalaǵan. Oǵan oraı elimizdiń sýretshileri men sáýletshilerine óz jumystaryn usynýǵa 2 aı ýaqyt berilgen.
«Bıyl 300-den astam jumys kelip tústi. Olardyń tek 40-tan astamy ǵana «Nurjol» jelekjoly aýmaǵynda kórsetildi. Osy jylǵy festıval óte jaqsy ótti dep aıtýǵa bolady. Eń bastysy, halyqtyń kóńilinen shyqqanyna senimdimiz»,- dedi Á.Nurpeıisov.
Esterińizge sala ketsek, 2015 jyly Astana Art Fest festıvaline 44 qazaqstandyq, 10 sheteldik shyǵarmashylyq ókilderi qatysty. Úsh kúnde ony 300 myńdaı adam tamashalady.
