«Astana Arlans» jáne «Baký Faırs» boksshylarynyń salmaq ólsheý rásimi ótti

ASTANA. QazAqparat - Ázerbaıjannyń Gýbın aýdanynda «Astana Arlans» jáne «Baký Faırs» komandalarynyń 3 mamyrda ótetin sheshýshi match aldynda baspasóz máslıhaty men salmaq ólsheý rásimi ótti, dep habarlaıdy QazAqparat tilshisi Bakýden.

Baspasóz máslıhatyna WSB sýpervaızeri Abdellah Bessalım, Qazaqstan komandasynyń bas menedjeri Bolat Mankenov, «Astana Arlanstyń» bas bapkeri Sergeı Korchınskıı jáne «Baký Faırstyń» bas bapkeri men bas menedjeri qatysty.

Abdellah Bessalım: «Qazaqstanda ótken birinshi kezdesýde uıymdastyrý joǵary deńgeıde boldy», dep atap ótti.

Aıta keteıik, qajet bolǵan jaǵdaıda qosymsha jekpe-jek ótedi. 81 keli salmaqta ótetin bul synǵa Teımýr Mamedov pen Ádilbek Nııazymbetov túsedi.

«Eger qosymsha jekpe-jek bolatyn bolsa men óz komandama jeńis syılaý úshin barymdy salamyn», deıdi Ádilbek Nııazymbetov.

Esterińizde bolsa, Astanada ótken kezdesýde jerlesterimiz 3:2 esebimen basym túsken bolatyn. Sheshýshi kezeńde ázerbaıjandyq komanda 1 upaı ǵana artyq alsa, onda fınalǵa joldama solarǵa buıyrady.