«Astana Arlans» pen reseılik «Patriot boxing team» komandalary kezdesedi
ASTANA. QazAqparat - Erteń Qaraǵandydaǵy Serik Sápıev atyndaǵy boks ortalyǵynda WSB Dúnıejúzilik boks serııasynyń jetinshi maýsymy sheńberinde «Astana Arlans» reseılik «Patriot boxing team» komandasyna qarsy shırek fınaldyń qarymta kezdesýin ótkizedi.
Reseı boksshylary toptyq básekede «arlandarmen» bir topta boldy. Jáne eki jekpe-jekte de «Astana arlandary» qarsylastarynan basym tústi. Máskeýde ótken alǵashqy aıqasta Aqúrpekovtiń komandasy 3:2 esebimen jeńiske jetse, elimizde ótken qarymta kezdesýde 4:1 esebimen basymdyq tanytty. Bir-birin jaqsy tanıtyn syralǵy qarsylastar pleı-off básekesinde qaıta joldary túıisip, alǵashqy kezdesýde qazaq jigitteri 3:2 esebimen jeńiske jetken bolatyn. Kezdesý osydan bir apta buryn Kemerovoda ótken edi.
«Astana arlandarynyń» bas bapkeri Nurlan Aqúrpekov reseılik komandaǵa qarsy shyǵatyn boksshylardyń esimin jarııalady. Rıngke Oljas Sáttibaev, Zakır Safıýllın, Aslambek Shymbergenov, Arman Rysbek jáne qaraǵandylyq Dmıtrıı Zısko shyǵady. Eger esep teń bolsa, qosymsha jekpe-jek ótkiziledi. Bul jekpe-jekke Nursultan Amanjolov shyǵady.
«Astana arlandary» klýbynyń resmı saıtyndaǵy málimetke súıensek, Búkilálemdik boks serııasynyń basshylary shırek fınaldyń jerebesi tartylǵan sátte qosymsha jekpe-jek +91 keli salmaqta ótedi dep sheshken.
Eske sala keteıik, búgingi tańda «Astana Arlans» Dúnıejúzilik boks serııasynyń jetinshi maýsymynyń qorytyndysy boıynsha birinshi oryndy ıelenip tur.
