«Astana Arlans» komandasynyń jetekshisi D&G Milano Thunder-ge qarsy shyǵatyn sportshylardyń esimderin atady
ASTANA. 30 qańtar. QazAqparat - «Astana Arlans» komandasynyń jetekshisi Bolat Mankenov úshinshi aqpan kúni D&G Milano Thunder-ge qarsy shyǵatyn sportshylardyń esimderin atady, dep habarlaıdy «Alaman» ulttyq sport portaly.
«54 keli salmaqta Ismaıl Ahýnov shyǵady. Bıylǵy maýsymda ol bir ret jeńip bir ret jeńilis kórdi. Ismaıl jas ári jigerli. Sondyqtan bul jobaǵa jyldam beıimdele aldy. Ózi almatylyq bolǵandyqtan qala turǵyndaryn jerge qaratpaýǵa tyrysady dep oılaımyn», - dedi Mankenov.
61 keli salmaq dárejesinde «Astana Arlans-tyń» namysyn Mereı Aqshalov qorǵamaq. Ázirshe Mereı jeńilissiz keledi. Aqshalov syrt alańda ese jiberip kórgen joq, aldaǵy kezdesý óz otanynda bolatynyn eskersek jaqsy nátıje kórsetýi tıis.
73 kelide «Arlandardyń» atynan komanda kapıtany Qanat Islam shyǵady. Bolat Mankenovtyń sózine qaraǵanda, Qanat óz babynda. Jankúıerler namysty jigittiń ónerin tamashalaı otyryp mol lázzat alýy tıis. Italıandyq boksshy men aljırlik legıonerimiz Abdelhafıda Benshabla arasynda ótetin kezdesý de óte tartysty bolady dep kútilýde. «Italııada ótken jekpe-jekte Abdelhafıd tehnıkalyq nokaýtpen utylǵan bolatyn. Bul joly ese qaıtarmasa bolmaıdy», - dedi komanda dırektory.
Reseıdiń «Dinamo-symen» ótken kezdesýde qaharman atanǵan Rýslan Myrsataev baıaǵysha 91 kelide shyqpaq.
Esterińizge sala ketsek, týrnırlik kestede D&G Milano Thunder komandasy birinshe satyda tur. Astananyń arlandary tek ıtalıandyqtardan jeńilgen bolatyn. Qarymta match Almatydaǵy Balýan Sholaq sport saraıynda 3 aqpan kúni ótpek.
