«Astana Arlans» klýbynyń boksshylary jas sportshylarmen jattyǵý ótkizdi
KÓKShETAÝ. QazAqparat - «Astana Arlans» klýbynyń boksshylary Býrabaı aýdanyndaǵy boks mektebiniń tárbıelenýshilerimen eki kún boıy ashyq jattyǵý ótkizdi, dep habarlaıdy QazAqparat tilshisi Aqmola oblystyq dene shynyqtyrý jáne sport basqarmasynyń baspasóz qyzmetine silteme jasap.
Eske sala keteıik, 24 aqpanda saǵat 16.30-da tuńǵysh ret Býrabaı aýdanynyń Şýche qalasyndaǵy «Jaqsy-2» sport kesheninde «WSB» dúnıejúzilik boks serııasy VIII kezeńiniń halyqaralyq matchy ótkiziledi. Qazaqstandyq «Astana Arlans» klýby reseılik «Patrion Boxing Team» klýbynyń boksshylarymen qolǵap túıistiredi. Arlandyqtar sapynda kókshetaýlyq Temirtas Júsip sharshy alańǵa shyǵatyn bolady.
Aqmola oblystyq dene shynyqtyrý jáne sport basqarmasynyń basshylary óńirde osyndaı kezdesýdi ótkizý jastardyń sportqa degen qulshynysyn arttyrýǵa septigin tıgizedi dep otyr.
«Bul kezdesý Aqmola oblysynyń boks mektebi úshin úlken jetistik. Şýche qalasynda «WSB» dúnıejúzilik boks serııasy VIII kezeńiniń halyqaralyq matchy tuńǵysh ret ótkizilgeli tur. Bul osynda tárbıelenip jatqan jas sportshylardyń boksqa degen qyzyǵýshylyǵyn arttyryp, sheberlikterin odan ári shyńdaı túsýlerine múmkindik beredi », - deıdi Aqmola oblystyq dene shynyqtyrý jáne sport basqarmasy basshysynyń orynbasary Áset Búkibaev.
