«Astana Arlans» - «Indian Tigers» aıqasy qashan ótetini anyqtaldy
ASTANA. QazAqparat - «Astana arlandary» Dúnıejúzilik boks serııasynyń VIII maýsymy aıasyndaǵy alǵashqy kezdesýin 10 aqpan kúni ótkizedi, dep habarlaıdy QazAqparat.
Komandanyń baspasóz qyzmeti taratqan málimetke sáıkes, osy maýsymdaǵy arlandyqtardyń alǵashqy qarsylasy jobaǵa birinshi ret qatysyp otyrǵan úndistandyq «Indian Tigers» komandasy bolmaq. Kezdesý 10 aqpan kúni Qaraǵandydaǵy Serik Sápıev atyndaǵy boks ortalyǵynda ótedi. Al odan bir kún buryn atalǵan ortalyqta boksshylardyń salmaqtary ólshenip, BAQ ókilderine arnalǵan baspasóz máslıhaty uıymdastyrylady.
Jańa maýsymda dodaǵa 11 komanda qatysady. Komandalar qurlyqtar boıynsha úsh topqa bólingen. Jerebe tartý rásimi boıynsha «Astana arlandary» Azııa aımaǵyndaǵy topta Qytaıdyń «China Dragons», Úndistannyń «Indian Tigers» jáne Reseıdiń «Patriot Boxing Team» komandalarymen kezdesedi.
Al Amerıka qurlyǵy boıynsha Kýba, Venesýela, Ózbekstan jáne Kolýmbııa ózara myqtyny anyqtasa, Eýropa qurlyǵy arasynda Horvatııa, Frantsııa, Anglııa jáne Italııa quramalary ózara synǵa túsedi. Sońynda ár qurlyqtyń jeńimpazdary naǵyz chempıondy anyqtaıdy.
Esterińizge sala keteıik, «Astana arlandary» - WSB jobasynda úsh ret jeńse, tórt ret kúmis júldeger atandy. Eki ret kýbalyq boksshylar top jarsa, Frantsııa men Italııa komandalary bir-bir retten jeńiske jetti.
Aıta keteıik, keshe ǵana Olımpıada chempıony Baqtııar Artaev «Astana Arlans» kásipqoı boks klýbynyń dırektory bolyp taǵaıyndalǵan bolatyn.
