«Astana Arlans» boksshylary naýqas bala úshin qolǵaptaryn satty
KÓKShETAÝ. QazAqparat - «Astana Arlans» boks klýbynyń boksshylary bylǵary qolǵap saýdasynan túsken 1,4 mıllıon teńgeden astam qarjyny «kóbelek sındromy» dertimen naýqas bala Artýr Grışýktiń anasyna tabys etti, dep habarlaıdy QazAqparat tilshisi.
Aqmola oblysynyń dene shynyqtyrý jáne sport basqarmasy baspasóz qyzmetiniń deregi boıynsha, ótken demalys kúnderi Şýche qalasynda Búkilálemdik boks serııasynyń (WSB) 8 maýsymy aıasynda «Astana Arlans» pen «Patriot Boxing Team» boks klýbtarynyń boksshylary jekpe-jekter ótkizdi. Tartysty kezdesýde arlandyqtardy qonaqtardy 5:0 esebimen oısyrata utty.
Kezdesý aıaqtalǵan soń «Astana Arlans» klýbynyń boksshylary bylǵary qolǵaptaryn satý boıynsha aýktsıon ótkizdi. Odan túsken 1,4 mıllıon teńgeden astam qarjyny «kóbelek sındromy» dertimen naýqas bala Artýr Grışýktiń anasyna Olga Grışýkke tabys etildi.
Sırek kezdesetin bul dert Artýrdyń tolyqqandy ósip, damýyna kedergi keltirýde. Ystyǵynyń jıi kóterilýi, denesiniń muzdap, álsireýiniń saldarynan bala tipti dalaǵa da shyǵa almaıtyn kórinedi. Artýr Bishkek jáne Máskeý qalasyndaǵy balanyń densaýlyǵy ortalyǵynda tekserilip, emdelgen. Alaıda, odan esh nátıje shyqqan joq.
«Balamanyń aýyryp, qınalyp júrgenin kórgende ana júregim ekige aıyrylǵandaı kúı keshemin. Balamdy bári jaqsy bolady, shyda dep ýatamyn. Denesindegi teriniń 60-70 paıyzy zaqymdanǵan. Kúnine ár eki saǵat saıyn denesin dákemen tanyp otyrý qajet. Kúnnen kúnge derti ýshyǵyp barady. Qaıtsek te, jazylyp ketetinine senemiz. Bári jaqsy bolady, oǵan bizdiń erkimiz ben qýatymyz jetedi», deıdi Olga Grışýk.
