«Astana Arlans» boks jankúıerleri arasynda týrnır ótkizedi

ASTANA. QazAqparat - «AstanaArlans» kásipqoı boks klýby boks jankúıerleri arasynda alǵash ret respýblıkalyq týrnır ótkizedi, dep habarlaıdy QazAqparat tilshisi.

«Qazaqstandyqtardyń kópshiligi sportshylarymyzdyń halyqaralyq jarystaryn kóredi, ánuranymyz oınap, kók týymyz jelbiregende qýanady. Endi jankúıerler men bokssúıer qaýym tuńǵysh «Astana Arlans» kýbogy týrnırine qatysa alady. Jarys salaýatty ómir saltyn nasıhattaý úshin, qatysýshylardyń sporttyq sheberligin shyńdaý úshin jáne qaıyrymdylyq naýqany retinde uıymdastyrylady», - dep habarlady «AstanaArlans» klýbynyń baspasóz qyzmeti.

Týrnır 13-16 jeltoqsan kúnderi Astanadaǵy «Dáýlet» sport kombınatynda ótedi. Oǵan 18 jastan asqan er adamdar 60 keli, 65 keli, 71 keli, 77 keli, 85 keli, 91 keli jáne 91 keliden joǵary salmaq sanattarynda qatysa alady.

Aıta keterligi, sportshylar, sporttyq jekpe-jek boıynsha sport sheberligine kandıdat jáne odan da joǵary dárejesi barlar týrnırge qatystyrylmaıdy.

Jekpe-jek qatysýshylaryna jeıde men shlem beriledi. Aıqas 2 mınýttan 3 raýndqa sozylady.

Birinshi oryn alǵan qatysýshyǵa «Astana Arlans» kýbogy, medal jáne gramota beriledi. Ekinshi jáne úshinshi oryn alǵan qatysýyshlarǵa da medal men gramota tabystalady.

Sonymen birge, jarys qatysýshylary «Týrnırdiń úzdik boksshysy», «Kýbok pen «Astana» Prezıdenttik kásipqoı boks klýbynyń syılyǵy», «Kórermender kózaıymy» - «Astana Arlans» Kýbogy, «Jeńiske degen yntasy úshin» - «Astana Arlans» kýbogy júldeleri beriledi.

Týrnır qatysýshylaryn týrnırdiń qurmetti qonaqtary men elimizdiń tanymal boksshylary marapattaıdy. 

Jarysqa qatysýǵa arnalǵan ótinim «AstanaArlans» klýbynyń resmı saıtynda kórsetilgen.