«Astana arlandarynyń» búgingi jekpe-jekterin F.Falchınellı baqylaıdy
ASTANA. 11 mamyr. QazAqparat - WSB serııasyndaǵy fınaldyń búgingi jekpe-jekterin Eýropanyń boks konfederatsııasynyń prezıdenti Franko Falchınellı baqylaıdy. Bul týraly búgin Astanada ótken baspasóz máslıhatynda Halyqaralyq boks qaýymdastyǵynyń prezıdenti Chıng-Kýo Vý málim etti.
Aıta keteıik, Búkilálemdik boks serııasynyń (WSB) úshinshi maýsymynyń alǵashqy fınaldyq kúninen keıin «Astana Arlans» komandasy «Ukraine Otamans» boksshylaryn 3:2 esebimen utyp jatyr. Keshe, 10 mamyrda arlandyqtar Meıirbolat Toıtov, Sergeı Derevıanchenko jáne Hrvoe Sep jeńiske jetti. Olımpıadalyq chempıondar Vasılıı Lomachenko men Aleksandr Ýsık te Ýkraınanyń utysqa degen úmitin saqtap qaldy. Búgin sońǵy fınaldyq jekpe-jekter ótedi.
