«Astana arlandary» ulybrıtanııalyq boksshylarǵa qarsy kezdesýdi jeńilispen bastady
ASTANA. QazAqparat - Atyraýdaǵy «Jaıyq» sport kesheninde «Astana arlandary» men ulybrıtanııalyq «British Lionhearts» arasyndaǵy qarymta kezdesý ótip jatyr, dep habarlaıdy QazAqparat tilshisi.
«Arlandar» sapynda 52 keli salmaqta birinshi bolyp Sáken Bıbosynov sharshy alańǵa shyqty. Qarsylas komandanyń boksshysy Ýıl Kaýleımen ótken alǵashqy raýnd Sáken úshin sátti ótti. Osynyń arqasynda alǵashqy raýndta Sáken úsh tóreshiniń de upaıyn ıelendi. Alaıda, ekinshi raýndta brıtandyq basymdyǵyn tanytyp, tipti úshinshi raýndta alǵa shyqty. Ózine jaıly qashyqtyqty tańdap alǵan brıtandyq boksshy endigi kezekte aılasyn asyrtpastaı kóringen. Alaıda tórtinshi raýndta serııaly soqqylarymen qarsylasyn bas kótertpeı, basymdyqty qaıtarǵandaı kóringenimen, tóreshiler tórtinshi raýndty Kaýleıge berdi.
Bes raýndtyq tartysty kezdesý aqyry Ýıl Kaýleıdiń jeńisimen aıaqtaldy. Jalpy esep ázirge 3:3.
Eske sala ketsek, Búkilálemdik boks serııasynyń jartylaı fınalyndaǵy «Astana Arlans» pen «British Lionhearts» komandalary arasyndaǵy alǵashqy kezdesýde otandastarymyz jeńiske jetken bolatyn. Jartylaı fınaldyq kezeńniń alǵashqy aıqasyn syrt alańda, ıaǵnı Ulybrıtanııanyń Sheffıld qalasynda ótkizgen jerlesterimiz jergilikti boksshylardy 3:2 esebimen utyp, fınalǵa bir taban jaqyndaı túsken.
Jekpe-jek keshin «Habar» arnasy tikeleı efırden kórsetýde. Búgingi kezdesýde jeńiske jetken komanda kýbalyqtarmen nemese frantsýzdarmen (ekeýiniń arasyndaǵy aıqastyń jeńimpazymen) kezdesedi.
Foto: www.instagram.com/astanaarlans
