Astana arlandary taǵy da Kýba qablandarynan ońbaı taıaq jedi
ASTANA. QazAqparat - Dúnıejúizilk boks serııasy maýsymynyń matchtyq kezdesýinde «Astana Arlans» klýbynyń bylǵary qolǵap sheberleri «Cuba Domadores» boksshylaryna 0:5 esebimen ese jiberdi, dep habarlady sports.kz saıty.
Atap aıtqanda, 49 kelide sharshy alańǵa kóterilgen Temirtas Júsipov qarsylasy Iosbanı Veıtıadan aılasyn asyra almasa, Baǵdad Álimbekov (56 keli) Markos Forestaldan 0:3 esebimen ońbaı taıaq jedi. Al 64 keli salmaq sanatynda judyryqtasqan Rýslan Mádıev ıAsnıer Toledodan álsizdik tanytty. Sondaı-aq Erik Áljanovtyń (75 keli) Lýıs Ramonǵa laıyqty qarsylyq kórsetýge shamasy jetpedi. 91 kelide el namysyn qorǵaǵan Arbek Ábdýǵanıev bolsa 4-raýndta qarsylasy Erıslandı Savonýdan tehnıkalyq nokaýtpen utyldy.
Aıta keteıik, «Astana Arlans» boksshylary qorytyndy kezdesýlerin 1 naýryz kúni Almatyda «Hussars Poland» bylǵary qolǵap sheberlerine qarsy ótkizedi.
