«Astana arlandary» reseıliktermen jekpe-jekke shyǵatyn boksshylaryn iriktedi
ASTANA. 24 qańtar. QazAqparat - «Astana arlandary» 1 aqpanda ótetin Búkilálemdik boks serııasyndaǵy kezekti týrda reseılikterge qarsy rıngke shyǵatyn boksshylarynyń tizimin jarııalady.
Eń alǵash bolyp sharshy alańǵa shyǵatyn 49 kelidegi Azamat Isaqulov reseılik Belık Galanovpen judyryqtasady. Azamat WSB nusqasy boıynsha alǵashqy jekpe-jegin ótkizse, Belık Galanov bıylǵy maýsymdaǵy ekinshi jekpe-jegine shyǵady.
56 kelige deıingi salmaqta Meıirbolat Toıtovtyń qarsylasy - Edýard Abzalımov. Osy ýaqytqa deıin Meırbolat eki kezdesý ótkizip, ekeýin de jeńispen aıaqtaǵan. Al Edýard alǵashqy kezdesýin ótkizbek.
64 keli salmaqta «Arlandar» namysyn Ashat Ýálıhanov pen Grıgorıı Lızýnenko sharshy alańǵa shyǵady. Ashat osyǵan deıin eki kezdesý ótkizip, ekeýinde de basym túsken. Qazirgi ýaqytqa deıingi nátıje boıynsha Ashat óz salmaǵynyń №1-shi boksshysy. Lızýnenko bul jarystyń rıngine alǵash shyǵady.
75 kelige deıingi salmaqta ýkraınalyq legıonerimiz Sergeı Derevıanchenko reseılik Petr Hamýkovtan emtıhan alady. Sergeı osy maýsymdaǵy úshinshi jekpe-jegin ótkizse, qarsylasy alǵashqy kezdesýin ótkizbekshi.
Jepe-jekti qorytyndylaıtyn 91 keli salmaqta jeńilistiń dámin tatpaǵan otandasymyz Vasılıı Levıt reseılik Alekseı Egorovpen judyryqtasady. Bul Levıttiń úshinshi jekpe-jegi bolsa, Alekseıdiń debıýttik kezdesýi.
2013 jyldyń qarasha aıynda Sankt-Peterbýrgte ótken alǵashqy machta «Arlandar» 2-3 esebimen jeńiske jetken bolatyn.
Esterińizge sala ketsek ótken týrda «Arlandar» ázirbaıjandyq « Baku Fires» boks klýbyna 4-1 esebimen ese jiberip aldy. Al «Russian Boxing Team» Polshanyń «Hussars Poland» klýbyn 3-2 esebimen jeńgen.
«V» tobynyń týrnır kestesinde kýbalyqtar 18 upaımen 1-shi orynda, «Arlandar» jáne «Russian Boxing Team» 13 upaımen ekinshi jáne úshinshi oryndardy bólisip otyr. Osy kezdesýde jeńgen klýb ekinshi orynǵa kóterilmek.
«Astana Arlans» pen «Russian Boxing Team» arasyndaǵy jekpe-jek 1 aqpan kúni saǵat 19:30-da Balýan Sholaq atyndaǵy sport saraıynda ótedi, dep habarlady "Alaman".
