«Astana arlandary» men «British Lionhearts» aıqasatyn oryndar anyqtaldy
ASTANA. QazAqparat - WSB jobasy aıasynda óner kórsetetin «Astana arlandary» men «British Lionhearts» jekpe-jeginiń jartylaı fınalyndaǵy aıqastardyń ótetin oryny belgili boldy, dep habarlaıdy QazAqparat tilshisi.
«Arlandar» jartylaı fınaldaǵy alǵashqy kezdesýin 17 mamyr kúni Anglııanyń Sheffıld qalasyndaǵy Ponds Forge International ortalyǵynda, ekinshi qarymta aıqasyn 26 mamyrda Atyraýdaǵy «Jaıyq» sport kesheninde ótkizedi.
Esterińizge sala keteıik, «Astana Arlandary» osyǵan deıin Búkilálemdik boks serııasyn úsh ret jeńip alǵan bolatyn. Mundaı jetistikke áli eshbir komanda qol jetkizip kórgen emes.
Otandastarymyz alǵashqy chempıondyq ataqqa 2013 jyly enshiledi, ekinshi ret araǵa bir jyl salyp, 2015 jyly taǵy da bas júldeni qanjyǵasyna baılady. Al úshinshi ret ótken 2017 jyly taǵy da jeńisin toılady. Sondaı-aq, 2011 jyly ekinshi orynǵa, 2012, 2014 jáne 2016 jyldary úzdik úshinshi oryndarǵa qol jetkizdi. Mine, bıyl taǵy da jartylaı fınalǵa shyǵyp otyr.
