«Astana arlandary» quramyna úsh jańa boksshy keldi

"Alaman" ulttyq sport portalynyń málimetine qaraǵanda, onyń ekeýi bizge etene tanys Samat Bashenov pen Rýstam Sybaev. Endi biri - ýkraınalyq aýyr salmaqtaǵy Andreı Tomchýk. Samat pen Rýstam búginnen bastap jattyǵýǵa kiristi. Al ýkraınalyq boksshy Astanaǵa búgin kelmek.

Budan buryn habarlanǵandaı, komandanyń jańa músheleriniń biri  qyzylordalyq Rýstam Sybaev  - elimizdiń eki dúrkin chempıony, bir márte kúmis júldegeri, sondaı-aq Shoqyr Bóltekulyn eske alýǵa arnalǵan halyqaralyq bedeldi týrnırdiń jeńimpazy. Onymen birge komandaǵa qabyldanǵan qostanaılyq Samat Báshenov - elimizdiń jasóspirimder arasyndaǵy 2005 jylǵy chempıony, Azııanyń jasóspirimder arasyndaǵy 2006 jylǵy chempıony jáne eń úzdik boksshysy, elimizdiń eresekter arasyndaǵy 2010 jylǵy kúmis, 2011 jylǵy qola júldegeri. 60 kelige deıingi salmaqta óner kórsetti.

Jańa jyldyń aldynda «Astana Arlans» komandasynyń músheleri úılerine tarap ketti. Al qańtardyń 3-i kúni olar Astanada jınaldy. Komanda osynda Búkilálemdik serııanyń eń prıntsıpti matchtarynyń biri - 14 qańtar kúni AQSh-tyń  «Los Angeles Matadors» klýby boksshylarymen ótetin jekpe-jekterge daıyndalady. Osynyń aldynda, qarasha aıynyń ortasynda Muhıttyń arǵy jaǵalaýynda ótken osy qarsylastardyń birinshi kezdesýinde AQSh komandasy 3:2 esebimen jeńip ketken edi.