«Astana arlandary» kásipqoı boksshylar klýby Qytaıdyń «Beıjiń aıdaharlary» komandasymen jekpe-jekke shyǵady
ASTANA. 10 jeltoqsan. QazAqparat /Jasulan Amanbaıuly/ - Erteń Astanadaǵy «Dáýlet» sport kesheninde Búkilálemdik boks serııasynyń (WSB) nusqasy boıynsha kezekti match ótedi.
Qazaqstannyń kásipqoı boks quramasy dep tanylǵan «Astana arlandary» kásipqoı boksshylar klýby Qytaıdyń «Beıjiń aıdaharlary» komandasymen qolǵap túıistiredi.
Soǵan oraı, búgin eki komandanyń boksshylary match aldyndaǵy salmaq ólsheý rásimin jasady. Erteńgi kezdesýde el namysyn Qanat Ábýtálipov, Azamat Smaǵulov, Mıras Baıyrhanov, Maksvel Amponso jáne Rýslan Myrsataev qorǵaıdy.
«Astana arlandary» klýbynyń bas dırektory Bolat Mankenovtiń aıtýynsha, komanda aldaǵy jekpe-jekke tolyǵymen daıyn.
Al qytaılyqtardyń sapynda 85 keli salmaqta óner kórsetetin Ksıýjı Djıaonyń kúrt salmaq tastaýyna baılanysty Astanadaǵy jekpe-jekten alastatyldy.
Jalpy Qazaqstannyń kásipqoı boks quramasynda 15 boksshy bar. 5 salmaq dárejesiniń árbirinde 3 boksshydan jasaqtaldy.
Buǵan deıin elordadaǵy «Dáýlet» tennıs kesheninde ótken kezdesýde qazaq bylǵary qolǵap sheberleri káristiń «Inchhon qyrandary» dep atalatyn klýbyn 5:0 esebimen oısyrata jeńgen bolatyn. Ókinishke oraı kelesi aınalymda Almatydaǵy «Dostyq» kesheninde Ázirbaıjannyń Baku Fires komandasymen qolǵap túıistirgen qazaqstandyq bokshylar 4:1 esebimen ese jiberdi.
Jalpy AIBA uıymynyń qoldaýymen bolyp jatqan WSB klýbtyq jarysy Azııa, Eýropa jáne Amerıka aımaqtyq konferentsııalary boıynsha ótkizilýde. Qazaqstannyń «Astana arlandary» boksshylary Qytaı, Ońtústik Koreıa jáne Ázirbaıjan memleketteriniń bylǵary qolǵap sheberlerimen birge Azııa konferentsııasyna kiredi.
WSB áýesqoı boksshylarǵa óz eliniń namysyn Olımpıadalyq oıyndarda qorǵaýǵa tyıym salmaıtyndyqtan, WSB chempıonaty áýesqoı boksshylarǵa kásipqoı boksta baq synaýlaryna múmkindik beretin birden bir platforma bolyp tabylady.
