«Astana Arlandary» ıtalııalyq komandaǵa qarsy ulttyq qurama boksshylaryn shyǵarmaq

Buǵan deıin alty kezdesý ótkizip, barlyǵynda jeńiske jetken «arlandar» endi Italııa bylǵary qolǵap sheberlerimen kúsh synaspaq.

Almatyda ótetin jekpe-jekke baılanysty qos komandanyń bas bapkerleri osydan sanaýly kúnder buryn kezdesýge qatysatyn boksshylardyń tizimin jarııalady. Shyny kerek, «Astana Arlandary» komandasynyń bas bapkeri Marat Jakıev apta saıyn jankúıerlerge tosyn syı tartý etýde. Osyǵan deıin Jánibek Álimhanuly, Danııar Eleýsinov syndy ulttyq quramanyń betke ustar boksshylaryn sharshy alańǵa shyǵarǵan Jakıev Italııa boksshylarymen bolatyn aıqasta álem chempıonatynyń qola júldegeri Qaırat Eralıevke senim artpaq. 56 keli salmaqta «arlandar» namysyn qorǵaýǵa bel býǵan Eralıev Italııa klýbynda óner kórsetetin ırlandııalyq Maıkl Konlanmen judyryqtasady. Irlandııalyq boksshy áýesqoı boksta ájeptáýir jetistikke jetken boksshylardyń biri. Óz elinde eki dúrkin chempıon atanǵan Konlan 2012 jyly London olımpıadasyna qatysyp, 52 keli salmaqta qola júldeger atandy. Sondaı-aq, 2013 jylǵy Eýropa birinshiliginde kúmis medaldi qanjyǵasyna baılady. Búkilálemdik boks serııasynyń bıylǵy maýsymynda 3 jekpe-jekke qatysyp, ekeýin jeńispen aıaqtap, bireýinde utylyp qaldy. Italııa komandasynyń bapkerleri Konlanǵa kóbirek senim artatynyna qaraǵanda ırlandııalyq boksshy osy joba arqyly Rıo olımpıadasynyń joldamasyn jeńip alýdy kózdeıtin sııaqty. Ázirge bul boksshy álemdik reıtıngtiń 2-satysynda tur. Basqa salmaq dárejelerine kelsek, 49 kelide «Astana Arlandarynyń» namysyn Temirtas Júsipov qorǵaıdy. Temirtas qańtar aıynyń sońǵy kúni ázirbaıjandarmen ótken jekpe-jekke shyǵyp, qarsylasyn utqan bolatyn. Endi ol Patrık Barnspen qolǵap túıistiredi. Barns te Konlan sııaqty Irlandııadan kelgen boksshy. Álemge aty tanylyp úlgergen ırlandııalyq bylǵary qolǵap sheberi Olımpıada oıyndarynda eki márte qola júldeger (2008, 2012 j.) atanǵan. Buǵan Eýropa chempıony (2010 j.), ári kúmis júldegeri (2013 j.) degen ataqtaryn qosyńyz. Bıylǵy maýsymda úsh jekpe-jek ótkizip, barlyǵyn jeńispen aıaqtaǵan Barns álemdik reıtıngtiń kóshin bastap tur. 64 keli salmaqta Italııa klýbynyń taǵy bir múshesi Vınchentso Mandjakapreni de qaperde ustaýǵa tıispiz. Otandasymyz Asqat Ýálıhanovqa qarsylas atanǵan Mangıakapre de ırlandııalyqtar sııaqty Olımpıada oıyndarynda júlde alǵan boksshy. 2012 jyly ol London olımpıadasynda qola medaldiń ıegeri atansa, 2011 jylǵy álemdik saıysta da úzdik úshtikti qorytyndylady. Asqat Ýálıhanovqa kelsek, «arlandar» sapyna byltyr ǵana qosylǵan otandasymyzdyń Mangıakaprege qaraǵanda tájirıbesi az bolsa da, óz jerimizde namysty qoldan bermeıtin boksshylardyń biri. Asqattyń bıylǵy maýsymdaǵy alǵashqy jekpe-jegi sátsiz bolǵanymen bul joly babyna keler degen senimdemiz. 75 jáne 91 keli salmaq dárejelerinde qonaqtardyń sapynan Rafael Mýnno (75 keli) men Endrı Spahıý (91 keli) sharshy alańǵa shyǵady. Bul eki boksshy da ıtalıandyqtar. Bularǵa qarsy «arlandar» tarapynan Meıirim Nursultanov pen Vasılıı Levıt óner kórsetpek. Bir aıta keterligi, Meıirim de, Vasılıı de bıylǵy maýsymda jeńilgen joq. 75 keli salmaqta óner kórsetetin Meıirim Nursultanov osyǵan deıin eki jekpe-jekke qatysyp, ekeýin de jeńispen aıaqtady. Álemdik reıtıngte - 3-orynda. Al, Vasılıı Levıt bolsa, úsh jekpe-jekte de taza jeńiske jetip, álemdik reıtıngtiń 1-satysynda tur. Eger «arlandarymyz» osy joly da jeńisti joldaryn jalǵastyrar bolsa, reıtıngtik upaılaryn eseleı túsetini anyq. Italııa komandasynyń boksshylary Búkilálemdik boks serııasyna alǵashqy jyldardan bastap qatysyp keledi. Birinshi maýsymda jartylaı fınaldan qaıtqan ıtalıandyqtar ekinshi jyly jobanyń bas júldesin jeńip aldy. Jalpy «arlandar» men ıtalıandyq komanda Búkilálemdik boks serııasynda ózara tórt ret jolyǵypty. Naqtyraq aıtsaq, 2011/12 jylǵy maýsymda «arlandar» syrt alańda 0:5 esebimen utylyp qalsa, óz jerimizde ótken jekpe-jekte 3:2 esebimen jeńiske jetti. Odan keıingi jyly qos komanda taǵy da toptyq saıysta birge óner kórsetti. 2011-12 jyl. A toby. Toptyq kezeń «Mılano tander» (Italııa) - «Astana arlandary» - 5:0 «Astana Arlandary» - «Mılano tander» (Italııa) - 3:2 2012-13 jyl. V toby. Toptyq kezeń. «Astana Arlandary» - «Mılan» (Italııa) - 3:2 «Mılan» (Italııa) - «Astana Arlandary» - 4:1