«Astana arlandary» - «Inchhon qyrandary»: Qanat Islam qarsylasyn nokaýtqa jiberdi
ASTANA. 17 qańtar. QazAqparat - Ótken senbide elordadaǵy «Dáýlet» sport kesheninde AІVA-nyń Búkilálemdik boks serııasynyń kezekti jekpe-jekteri ótip,
«Astana arlandary» Ońtústik Koreıanyń «Inchhon qyrandaryn» 5:0 esebimen oısyrata jeńdi.
Birinshi bolyp sharshy alańǵa kóterilgen 54 keli salmaqtaǵy qazaq bylǵary qolǵap sheberi Qanat Ábýtálipov barlyq 5 raýndta da óziniń basymdyǵyn aıqyn tanytty. 61 keli salmaq dárejesinde de Astana arlandary komandasynyń namysyn qorǵaǵan Mereı Aqshalovtyń mereıi ústem boldy. Buǵan deıingi kezdesýde Mereı dál osy qarsylasy Afıny olımpıadasynyń qola medal ıegeri, álem chempıonatynyń júldegeri ózbekstandyq Bahadýrjon Sýltonovpen sharshy alańda kezdesip, utqan bolatyn. Bul joly da sol erligin qaıtalady. Azýly qarsylasyna esh múmkindik bermegen ol barlyq úsh tóreshiniń sheshimimen jeńiske jetti. Boks jankúıerleriniń asyǵa kútken kelesi jekpe-jegi Beıjiń olımpıadasynyń qola medal ıegeri Qanat Islam men armenııalyq Hakobıan Andranıktyń arasynda ótti. Astana arlandary komandasynyń quramasynda alǵash ret óner kórsetip otyrǵan Qanat alǵashqy raýndtyń birinshi mınýtynda qarsylasynyń ańdysyn ańdyp, sońǵy sátterde belsendi shabýylǵa shyqty. Al kelesi raýndtyń alǵashqy mınýtynda-aq Qanat qarsylasyn nokdaýnǵa jiberdi. Óz basymdyǵyn aıqyn sezingen qazaq boksshysy alǵa umtylyp, qarsylasyn aýyr soqqylardyń astyna aldy. Taǵy da nokdaýn. Shydamdylyq tanytyp ornynan qaıta kóterilgen Hakobıan Qanattyń kelesi aýyr soqqysynan nokaýt alyp, ornyna tura almaı qaldy.
Sondaı-aq 85 jáne 91 keliden joǵary salmaq dárejesinde «Astana arlandary» komandasynyń namysyn qorǵaǵan ózbek boksshylary Ramzdjon Ahmedov pen Sardor Abdýllaevtarda qarsylastarynan basym tústi.
Esterińizge sala keteıik, bizdiń bylǵary qolǵap sheberler 29 qańtarda osy komandamen taǵy bir márte sharshy alańda kezdesedi.
