«Astana arlandary» ese qaıtarýdy kózdeıdi
ASTANA. 13 qańtar. QazAqparat /Arman Asqarov/ - Erteń, 14 qańtardyń kúni Astanadaǵy «Dáýlet» sport kesheninde WSB - Búkilálemdik boks serııasynyń «A» tobynda óner kórsetip jatqan «Astana arlandary» komandasy "Los Angeles Matadors" klýbynyń boksshylarymen kúsh synasady.
Osyǵan oraı, búgin elordada ótken arnaıy baspasóz máslıhatynda komanda bapkerleri óz shákirtterin tanystyrdy. Іs-shara aıasynda boksshylardy tarazylaý rásimi ótti.
Bul jolǵy kezdesýge AQSh-tyń "Los Angeles Matadors" klýby 4 birdeı legıonerdi alyp kelip otyr. Besinshi boksshy - jasóspirim Djoet Gonsales qana Kalıfornııanyń azamaty. Alǵashqy kezdesýde ol arlandyq Danııar Toqbaevpen sharshy alańǵa shyǵady. Osydan keıin, 61 salmaqtaǵy Mereı Aqshalov Ýkraınanyń eki dúrkin chempıony Leonıd Malkovpen judyryqtasatyn bolady. Komanda kapıtany Qanat Islam bolsa, Grýzııanyń úsh dúrkin chempıony Zaal Kvatchatadzemen kezdesedi. Aýyr salmaq dárejesinde bizdiń legıonerimiz Ramzjon Ahmedov «Belarýs hammeri» atanyp ketken Sergeı Korneevpen baqtalastyrsa, 91 keliden joǵary asa aýyr salmaqta Rýslan Myrsataev marokkolyq boksshy Mohammed Ardjaýıdi synap kórmek.
«Astana arlandary» komandasynyń bas bapkeri Beıbit Esjanov atap kórsetkendeı, bul kezdesýdi revansh sanaýǵa bolady. «Buǵan deıingi jarysta biz "Los Angeles Matadors" boksshylarynan jeńilgen bolatynbyz. Endi, osy joly barymyzdy salyp, ese qaıtarýǵa tyrysamyz», - deıdi ol.
Aıta keteıik, búginde "A" tobyndaǵy komandalar arasynda 5 kezdesýdi de óz paıdasyna sheship, 15 upaı jınaǵan "D&G Milano Thunder" komandasy birinshi orynda kele jatyr. Odan keıingi orynda 10 upaımen eki kezdesýde jeńip, úsheýinde jeńilis tapqan "Astana Arlans" (Astana arlandary) tur. Olardan 1 upaıy kem "Los Angeles Matadors" úshinshi orynǵa taban tireýde. Eki kezdesýde ǵana jeńiske jetken "Dynamo Moscow" men "Mumbai Fighters" komandalarynyń qorjynynda 7 upaıdan bar. Top sońyndaǵy "Bangkok" ázirge birde-bir kezdesý ótkizgen joq.
Al "V" tobynda 4 kezdesýdi de óz paıdasyna sheshken "Baku Fires" 12 upaımen kósh bastaýda. 1 jeńilisi bar "Leipzig Leopards" - 9 upaı, 2 jeńilisi bar "Mexico City Guerreros" - 7 upaı jınady. Sondaı-aq 3 kezdesýdiń bireýinde ǵana jeńgen "Paris United" - 4 upaı, "Wuxi Dragons -3, al 4 kezdesýde de jeńilis tapqan "Istanbul Bosphorus" 2 upaıǵa ıe.
