«Astana arlandary» - Dúnıejúzilik boks serııasy boıynsha eki dúrkin chempıon bolǵan alǵashqy komanda

Elorda tórindegi «Dáýlet» sport kesheninde Dúnıejúzilik boks serııasynyń (WSB) aqtyq saıysyna joldama alǵan qos komanda «Astana arlandary» men «Kýba qabylandary» chempıondyq ataqqa talasyp, jan alyp, jan berisken dodada jerlesterimiz chempıon atandy.

Eki komanda da bıylǵy maýsymda aldaryna qara salmaı, toptyq týrnırde jeke-dara kósh bastady. Jartylaı fınalda da óz qarsylastaryn oısyrata utqan olar bas júlde úshin talasý quqyǵyna ıe bolǵan edi.

Qazaq boks mektebiniń tamyry tereńde jatqanyn «Astana arlandary» álemge jyl saıyn dáleldep keledi. Osyǵan deıin WSB jobasynda bes jyl óner kórsetken boksshylarymyz jyl saıyn júldesiz qalyp kórgen emes. Elordamyzda qurylǵan «Arlandarymyz» 2013 jyly WSB dodasynyń chempıony atandy. Al 2011 jyly fınalda Frantsııa boksshylaryna bir ǵana esep aıyrmashylyǵymen ese jiberip, kúmis medaldi qanjyǵasyna baılasa, 2012 jáne 2014 jyldary úzdik úshtikti túıindep, qola medalǵa qol jetkizdi. Mine, bıylǵy jeńisti eskersek, bes jyl boıy jerlesterimiz júldesiz qalǵan joq. Dúnıejúzilik boks serııasy jobasynda jeńip alǵan júldeleri jaǵynan eshbir komanda qazaqstandyq «Astana arlandarynyń» shalymyna jetpeıdi.

Erterekte «boks» dese, kýbalyqtar birden esimizge oralatyn. Sebebi, kýbalyqtar álemdik arenada bokstaǵy jetistikterimen maqtana alatyn el. Biz «Kýba qabylandary» osal emes ekenin jaqsy bilemiz.

Ótken jylǵy maýsymǵa «Kýba qabylandary» atalmysh jobaǵa tuńǵysh qatysyp, soǵan qaramastan birden chempıon atandy. Al, bıylǵy maýsymda da «Qabylan­darǵa» óz tobynda qarsy turar birde-bir komanda bolmady. Kýbalyqtar aldyna kelgenin «jaıpap» qana otyrdy. Naqtyraq aıtsaq, WSB dodasyn­daǵy birde-bir komanda Bostandyq araly ókilderine qarsy tura almady. Jartylaı fınalda kýbalyqtar Meksıka boksshy­laryn seń soqqandaı etip, 10:0 esebimen oısyrata utty. Mine, joǵarydaǵy atap ótken nátıjege qarap-aq «Kýba qabylandarynyń» ózge komandalardan kóshi áldeqaıda ilgeri, áleýeti áldeqaıda zor eke­nin ańǵarýǵa bolady.

Ja­sy­ratyny joq, Astanaǵa kelgen qarsylastarymyzdyń osaly joq. Olardyń sapynda kileń yǵaı men syǵaılar óner kórse­tpek. 49 kelidegi Ioanıs Oskar Peres, 52 kelidegi Iosvanı Veıtıa Soto, 75 kelidegi Arlen Lopes Kar­dona jáne asa aýyr salmaqtaǵy Lener Enıs Pero ıÝstıs syndy boksshylar álem birinshilikterinde, sonymen qatar Pan-Amerıka oıyndarynda júldemen oralyp júrgen myqtylar eken.

Al, 56 keli salmaqta Robeısı Ramıres Karrasana bar. Ol 2012 jylǵy London olımpıadasynyń chempıony. 60 keli salmaqta Olımpıada oıyndarynyń qola júldegeri, álemniń eki dúrkin chempıony Lazaro Alvares te óz eliniń namysyn qorǵaýǵa alystan at arytyp jetipti. 64 keli salmaqta álem chempıonatynyń eki dúrkin kúmis júldegeri, Olımpıada oıyndarynyń qola júldegeri ıAsnıel Toledo Lopes te bar.

Al 69 keli salmaq dárejesindegi judyryqtasýǵa kelgen Ronıel Iglesıas Sotolongonyń aty ańyzǵa aınalǵan boksshy desek artyq aıtqandyq emes. Ol - London Olımpıadasynyń jeńimpazy, Beıjiń Olımpıadasynyń qola júldegeri jáne 2009 jylǵy álem chempıony ekenin jaqsy bilemiz. 81 keli salmaqta óner kórsetetin Hýlıo Sezar de la Krýz da osal boksshy emes. Ol eki dúrkin álem chempıony. 91 kelide baq synaıtyn Erıslandı Savon da myqty boksshylardyń biri ekenin boks súıer qaýym jaqsy biledi. Mine, «Kýba qabylandarynyń» quramy osyndaı eń myqty boksshylardan jasaqtalǵan. Jasyratyny joq, «Astana arlandarynyń» negizgi quramynda óner kórsetip júrgen bizdiń jigitterge joǵarydaǵy ataqtardyń birde-biri baǵynǵan joq.

Myqtynyń myqtylyǵyn aıtý ábestik emes. Biraq, bizdiń jigitter eshkimniń ataq-dańqynan seskengen joq. Eń bastysy bıylǵy jyldyń sheshýshi dodasy «Arlandardyń» basty maqsaty oryndalyp, Búkilálemdik boks serııasynyń 2 dúrkin chempıony atandy.

Endi tartysty ótken saıysqa toqtala ketsek:

Jarys shymyldyǵyn ashqan 49 keli salmaq dárejesindegi jerlesimiz Azııa chempıony Temirtas Júsipov kýbalyq Ioanıs Oskar Argılagos Peresten aılasyn asyrdy. Sharshy alańda bes raýnd boıy qarsylasynyń adymyn ashtyrmaǵan Temirtas Júsipovke tórt tóreshi de biraýyzdan jeńisti berdi. Osylaısha, 50-45 esebimen kýbalyq qarsylasyn bet qaratpaı utqan Temirtas Júsipov «Astana arlandary» komandasyn alǵa shyǵardy.

Ekinshi kezdesý ekinshi kezdesýde, 56 keli salmaq dárejesinde jerlesimiz Qaırat Eralıev kýbalyq Endı Robeısıden utylyp qaldy. Qarsylastar arasyndaǵy jekpe-jek asa tartysty ótti. Tóreshiler birinshi raýndta 10-9 esebimen jeńisti jerlesimizge bergenimen, ekinshi raýndta kýbalyq qabylan esepti teńestirip ketti. Al úshinshi raýndta qaptaldaǵy tórt tóreshi de qazaqstandyqtyń basymdyǵyn esepke alsa, tórtinshi raýndta esep qaıta teńesken bolatyn. Besinshi raýndta Qaırat Eralıev qarsylasyna ese jiberip aldy. Qorytyndy esep kýbalyqtyń qanjyǵasynda ketti: 47-48.

75 kelide óner kórsetken qazaqstandyq Meıirim Nursultanov Arlen Lopes Kardonany tize búktirdi. Osylaısha azýly kýbalyq boksshy Meıirim Nursultanovqa qarsy esh aıla jasaı almady.

91 kelidegi darejesinde saıysqa shyqqan boksshymyz Vasılıı Levıt tóreshilerdiń sheshimi boıynsha Erıslandı Savon Kotılladan jeńilis tapty. Aıta keterligi, boks qaýymdastyǵynyń reıtıngi boıynsha Astanadaǵy sharshy alańda kezdesken eki bylǵary qolǵap sheberi de álemniń úzdik boksshysy sanalady. Sondyqtan da, bul senbi kúni ótken fınaldyq jekpe-jektiń eń qyzyqty kezdesýi boldy dep aıtsaq artyq emes. Degenmen, aqtyq aıqasta qazylyq etýshi tóreshilerdiń bura tartqanyn da baıqaǵandaımyz. Óıtkeni, kezdesýde Vasılıı Levıttiń soqqylary dóp tıip, Erıslandı Savon Kotılladan áldeqaıda basymyraq bolǵan tárizdi edi. Alaıda, úsh tóreshiniń esebi boıynsha upaı sanymen «kýbalyq qabylan» jeńisti qanjyǵasyna baılap ketti. Osylaısha kezdesýdiń alǵashqy kún «Astana arlandary» 3:2 esebimen alǵa shyqty

Ekinshi kúnniń alǵashqy jeńisin 52 keli salmaq dárejesinde Oljas Sáttibaev syılady. Ol qarsylasy Iosvanı Veıtıa Sotony tize búktirdi. Birden aıtaıyq, kýbalyq boksshy - óz komandasynyń ǵana emes, álemdik reıtıngtegi úzdik boksshy. Degenmen, Oljas Sáttibaev birinshi raýndtan bastap jekpe-jekti óz basymdyǵynda ustady. Alma-kezek soqqylar barysynda qabaǵy jarylyp, jaraqat alǵanyna qaramastan, Oljas qarsylasyna esh múmkindik bergen joq. Tek tórtinshi raýndta ǵana kýbalyq basymdyqqa ıe bolǵanymen, jalpy esep 49:46 - qazaqstandyq boksshynyń paıdasynda.

Al, 60 keli salmaqtaǵy Zákir Safıýllın Lasaro Horhe Alvares Estradadan aılasyn asyra almady.

69 kelidegi Aslanbek Shymbergenov Ronel Iglesıas Sotolongony aıqyn basymdylyqpen jeńip, komandasyna besinshi jeńisti syılady. Aslanbek Shymbergenovtiń bul kezdesýin sensatsııaǵa da balaýǵa bolady. Óıtkeni, onyń qarsylasy Olımpıada chempıony, asa tájirıbeli Iglesıas Sotolongo bolatyn. Alǵashqy eki raýndta kýbalyq boksshynyń basymdyǵy baıqalǵanymen, Aslanbek úshinshi raýndtan bastap sharshy alańda naǵyz qojaıyn ekenin tanytty. Sotolongaǵa esh múmkindik qaldyrmastan, aqyry asa tájirıbeli boksshyny tize búgýge májbúrledi. Tóreshilerdiń úsheýi de jalpy esepte qazaqstandyqtyń joǵary deńgeıde óner kórsetkenin moıyndady, eki tóreshiniń upaı jazbalary 48-47 bolsa, bir tóreshi 50-45 dep bastan aıaq Aslanbekke jeńisti jazdy. Sóıtip, Olımpıada chempıony bizdiń jerlesimizge qarsy esh qaırat kórsete almady.

81 keli salmaqtaǵy Nurdáýlet Jarmanov pen Hýlıo Sesar la Krýs Perasa sheberlik synasty. Tóreshiler jeńisti biraýyzdan «kýbalyq qabylanǵa» berdi. «Astana Arlandary» sapyndaǵy Nurdáýlet Jarmanov sharshy alańda osal boksshy emes ekenin dáleldedi. Degenmen, kýbalyq boksshy óziniń tájirıbeliliginiń arqasynda jaqsy jekpe-jek mánerin kórsete bildi. Aıqas qorytyndysynda úsh tóreshiniń úsheýi de kýbalyqqa basymdyq berdi.

Aqtyq aıqasta «Astana arlandaryna» negizgi jeńisti + 91 keli salmaqta Ivan Dychko syılady. Ol Iohandı Toırak Ortegany aıqyn basymdyqpen utyp, «Kýba domadores» komandasyn tize búktirdi. Jalpy esep «Astana arlandarynyń» paıdasynda - 6:4! Osylaısha, Dúnıejúzilik boks serııasynyń besinshi maýsymynda «Astana arlandary» chempıon atandy. «Kýba qabylandary» osy maýsymda fınalǵa deıin eshkimdi bet qaratpaǵan bolatyn, olardyń qarqynyn tek «Astana arlandary» ǵana toıtaryp, qazaqstandyq boksshylar taǵy da ózderiniń álemdik arenadaǵy mereıin arttyra tústi.

Bir aıta keterlik jaıt, «Astana arlandary» Dúnıejúzilik boks serııasy boıynsha eki dúrkin chempıon bolǵan alǵashqy komanda atanyp otyr.

Jalpy bıylǵy maýsymda «Arlan­dar» jankúıerleriniń úmitin selge ketirgen joq. Qata­rynan 13 jekpe-jekte qarsylas shaq keltirmeı, mereıimizdi asyrǵan jerlesterimiz tek toptyq týr­nır­diń sońǵy saıysynda ǵana Ita­l­ııa boksshylarynan 2:3 esebimen utylyp qaldy. Alaıda, bul bir jeńilis «Arlandarymyzdyń» óz tobynda top bastaýyna esh kedergi bola qoıǵan joq. Sebebi, jerlesteri­miz alǵa qoıǵan jos­paryn aldyn ala oryndap, pleı-off máselesin kúni buryn sheship tastaǵan bolatyn. Sol sebepti de bir sátsizdik bizge keri áserin tıgize qoıǵan joq. Sondaı-aq, bul jeńilis bizdiń boksshylardyń álsizdigin de kórsete almady. Oılaı deıtinimiz jartylaı fınal­da bizdiń jigitter Reseı qurama­syn tas-talqan etti. Esep: - 9:1. Mine aqtyq saıysta «Astana arlandary» «Kýba qabylandaryn» 6:4 esebimen utyp, Dúnıejúzilik boks serııasynyń eki dúrkin chempıony atandy. Biz jerlesterimizdiń aldaǵy dodalarda qazaqtyń kók baıraǵyn bıikten jelbirete berýine tilektestik bildiremiz.

Kúnsultan Otarbaı