«Astana arlandary» Búkilálemdik boks serııasynyń (WSB) úshinshi maýsymyndaǵy jeńisti jolyn jalǵastyrýda

Keshe Almatydaǵy Balýan Sholaq atyndaǵy sport saraıynda olar "Ýkraın atamandarymen" qarymta kezdesýin ótkizgen edi. Buǵan deıin 2012 jyly 17 qarasha kúni Kıevte ótken úshinshi maýsymdaǵy tuńǵysh kezdesýde 2:3 esebimen "arlandardyń" mereıi ústem shyqqan bolatyn. Onda bul dúbirli dodaǵa alǵash ret qatysyp otyrǵan Mıras Jaqypovqa 3 kezdesý ótkizgen tájirıbeli boksshy Ivan Ilnıtskıı 0:3 esebimen oısyraı utylǵan edi. Bul joly 8 kezdesý ótkizgen tisqaqqan moldovalyq legıoner Aleksandr Rıskanǵa (54 kg) úmit artqan "atamandardyń" oılaǵan oıy júzege aspady. Alańdaǵy polıak tóreshisi qazaqstandyqtyń qolyn kóterdi. Mıras bul saıysta da 3:0 esebimen jeńip, óziniń úshinshi kezdesýinde de sheberligimen jankúıerin qýantty. Odan keıin syrt alańda Vıacheslav Kıslıtsynǵa utylyp qalǵan Erjan Músápirovti bul joly komanda kapıtany Samat Bashenovpen (61 kg) aýystyrǵan bas bapker Sergeı Korchınskııdiń taktıkasy óz nátıjesin berdi. Ýkraındardyń 24 jasar debıýtanty Dmıtrıo Rýdenkony dál osyndaı eseppen tize búktirgen Samat óziniń WSB-daǵy tórtinshi jekpe-jegindegi úshinshi jeńisine qol jetkizdi. Olardyń jeńisti jolyn astanalyqtardyń ızraıldik legıoneri Konstantın Snıgýr (73 kg) jalǵastyra almady. Ivan Golýbqa 0:3 esebimen jibergen ol osynyń aldynda jany murnynyń ushyna tirelip turǵan ýkraındyqtardyń esepti qysqartýyna múmkindik berdi.

Kıevtegi alǵashqy saıysta astanalyqtardyń ýkraınalyq legıoneri Sergeı Derevıanchenko (73 kg) óz jerlesi Dmıtro Mıtrofanovty 3:0 etip utqan edi. Al onda Denıs Poıatsıkaǵa 1:2 esebimen utylǵan «arlandardyń» ırandyq legıoneri Ehsan Rozbahanı (85 kg) Sergeı Lapındi 3:0 esebimen utyp, ese qaıtardy. Sondaı-aq «Astana arlandary» qatarynan altynshy ret jeńiske qol jetkizdi. Syrt alańdaǵy alǵashqy jekpe-jekte astanalyqtarǵa ony aqtyq kezdesýde horvatııalyq legıoner Fılıpp Hrgovıch (+91 kg) cyılaǵan edi. Ol Rostıslav Arhıpenkony 3:0 esebimen utyp, jalpy esepti 3:2-ge jetkizgen bolatyn. Bul joly Búkilálemdik boks serııasyndaǵy ótken jylǵy Azııanyń eń úzdik boksshysy, asaaýyr salmaqtaǵy Rýslan Myrsataev Anatolıı Antonıýkti 3:0 etip utyp, qarymta kezdesýdegi qorytyndy esepke núkte qoıdy.

Sonymen «atamandardy» 4:1 esebimen júndeı tútken «arlandar» Búkilálemdik boks serııasynda «V» tobyndaǵy altynshy jeńisimen, kóshbasshylyq ornyn nyqtaı tústi.