«Astana arlandary» Búkilálemdik boks serııasynyń fınalyna shyqty
«ASTANA. QazAqparat - Atyraýda ótip jatqan «Astana arlandary» men ulybrıtanııalyq «British Lionhearts» arasyndaǵy qarymta aıqastyń tórtinshi kezdesýi - Bek Nurmaǵambettiń jeńisimen aıaqtaldy. Osylaısha, jalpy 6:3 esebimen kósh bastaǵan qazaq boksshylary Búkilálemdik boks serııasynyń fınalyna shyǵyp otyr, dep habarlaıdy QazAqparat tilshisi.
Aıta ketsek, alǵashqy kezdesý (52 keli salmaqta Sáken Bıbosynov pen Ýıl Kaýleı arasyndaǵy aıqas) «British Lionhearts» komandanyń enshisinde ketken bolatyn.
Alaıda qazaq boksshylary bir jeńilistiń esesin eki jeńispen qaıtardy. Naqtyraq aıtqanda, Serik Temirjanov Kalým Frenchten (60 keli salmaqta) basym tússe, ekinshi kezdesýde brıtandyq Karl Feıldi qadaý-qadaý soqqylarynyń astyna alǵan Asylanbek Shyńbergenov (69 keli) jeńiske óz komandasyn bir qadam jaqyndata tústi.
Budan keıin 81 keli salmaqta Bek Nurmaǵanbet Lırıdýn Hýnany aıqyn basymdyqpen utty. Úshinshi raýndta Ulybrıtanııanyń atynan shyqqan shved legıoneri Hýna bir márte nogdaýnǵa túsip qalǵanymen, aıqastyń sońyna deıin shydap baqty. Osylaısha, Bek Nurmaǵambettiń jeńisi «Astana arlandaryn» 6:3 esebimen Búkilálemdik boks serııasynyń fınalyna shyǵaryp otyr.
Al Atyraýdaǵy boks keshinde sońǵy kezdesýdi týra qazir +91 keli salmaqta Qamshybek Qońqabaev pen Dakres Solomon ótkizip jatyr. Qamshybektiń jeńisi nemese jeńilisi jalpy esepke báribir áserin tıgizbeıdi.
Eske sala ketsek, Búkilálemdik boks serııasynyń jartylaı fınalyndaǵy «Astana Arlans» pen «British Lionhearts» komandalary arasyndaǵy alǵashqy kezdesýde otandastarymyz jeńiske jetken bolatyn. Jartylaı fınaldyq kezeńniń alǵashqy aıqasyn syrt alańda, ıaǵnı Ulybrıtanııanyń Sheffıld qalasynda ótkizgen jerlesterimiz jergilikti boksshylardy 3:2 esebimen utyp, fınalǵa bir jaqyndaı túsken.
Jekpe-jek keshi «Habar» arnasynda tikeleı efırde kórsetilýde. Búgingi kezdesýde jeńiske jetken komanda kýbalyqtarmen nemese frantsýzdarmen (ekeýiniń arasyndaǵy aıqastyń jeńimpazymen) kezdesedi.
