«Astana arlandary» boksshylarynyń mılandyq qarsylastarynyń esimderi belili boldy
ALMATY. 2 aqpan. QazAqparat /Erlik Erjanuly/ - «Astana arlandary» el senimin aqtaýǵa daıyn. Ony boksshylar búgin Almatyda salmaq tarazylaý rásimnen keıin ótken baspasóz máslıhatynda málimdedi.
3-aqpanda ótetin jekpe-jekke Italııanyń «D&G Milano Thunder» komandasy legıonerlerin saıdyń tasyndaı iriktep alyp kelipti. Sonymen Habýbýlla Ismaıl-Ahýnov ýkraındyq Vıtalıı Volkovpen (54 kg), Memit Aqshalov vengrııalyq Mıklosh Vargamen (61 kg), Qanat Islam ýkraındyq Sergeı Derevıanchenkomen (73 kg), Abdelhafıd Benshbala frantsııalyq Lıýdovık Grogýamen (85 kg), al asa Rýslan Myrsatav kamerýndyq Romarık Ngýlamen (+91 kg) qolǵap túıistiretin boldy. Bul kezdesý týraly óz pikirin bildirgen jýrnalıst saýalyna R. Myrsataev - «Inshalla erteń kórsetemiz ǵoı», - dep qysqa, da nusqa jaýap berdi. Al komanda kapıtany Qanat Islam: «Búkiálemdik boks serııasynda bul maýsymda chempıon bolýǵa barlyq jaǵdaı jasalyp otyr. Endi óz myqtylyǵymyzdy sharshy alańda kórsetýimiz kerek. Bári óz qolymyzda» deıdi. Bas bapker B. Esjanov ta: «El bizden jeńis kútip otyr. Jigitter kóńilden shyǵyp, el úmitin aqtaıtyn shyǵar», - degen senimin bildirdi.
