«Astana arlandary» boksshylaryna árbir jeńis úshin 5 myń AQSh dollary belgilendi
ASTANA. 13 qańtar. QazAqparat /Arman Asqarov/ - «Astana arlandary» komandasynyń boksshylaryna árbir jeńis úshin - 5 myń, al jeńilis úshin - 1 myń AQSh dollary belgilenip otyr.
Bul týraly búgin Astanada ótken baspasóz máslıhatynda Qazaqstannyń boks federatsııasyna qarasty «Astana arlandary» klýbynyń bas dırektory Bolat Mankenov málim etti.
Onyń habarlaýynsha, WSB - Búkilálemdik boks serııasy boıynsha óner kórsetip júrgen bizdiń sportshylar aıyna 1-2,5 myń dollar kólemindegi jalaqy alady. WSB federatsııasy árbir chempıonatta jeńis tuǵyrynan kóringen klýbqa 500 myń dollar, al jeńilgen komandaǵa 150 myń dollar mólsherinde syıaqy taǵaıyndaıdy.
Esterińizge sala keteıik, búginde WSB - Búkilálemdik boks serııasynyń «A» tobynda óner kórsetip jatqan «Astana arlandary» komandasy ekinshi orynda keledi. Aldaǵy ýaqytta osy toptyń kóshbasshysy anyqtalyp, ol «B» tobyndaǵy úzdik komandamen fınalda kezdesetin bolady. Erteń, bizdiń boksshylar Astanadaǵy «Dáýlet» sport kesheninde altynshy kezdesýin "Los Angeles Matadors" komandasymen ótkizetin bolady. Fınalǵa deıin áli tórt jarys bar.
