«Astana arlandary» Baku Fires komandasyn 5:0 esebimen utty
ASTANA. 14 naýryz. QazAqparat - Ótken senbide elordadaǵy «Dáýlet» sport kesheninde Ázirbaıjannyń Baku Fires komandasy qolǵap túıistirgen «Astana arlandary» qarsylastaryn 5:0 esebimen oısyrata utyp, ózderiniń Azııa myqtysy ekendigin dáleldedi.
Búkilálemdik boks serııasynyń Azııa konferentsııasyndaǵy basty qarsylaspen bolǵan kezdesýdi ashqan Mirjan Rahymjanov Baku Fires klýbyndaǵy mońǵol legıoneri Týgstgot Nııambaıardy aıqyn basymdyqpen utty. Kelesi kezekte sharshy alańǵa kóterilgen Erjan Músápirov te Koba Phakadzeden basym tústi. Osydan keıin boks jankúıerleri asyǵa kútken Qanat Islam sharshy alańǵa kóterilip, qarsylasy ózbekstandyq Batyrjon Mahmýdovpen qolǵap túıistirdi. Alǵashqy raýndta-aq basymdyq tanytqan Q.Islam qarsylasyn nokdaýnǵa jiberdi. Dál osy jaǵdaı úshinshi raýndta taǵy bir márte qaıtalandy. Al tórtinshi raýndta úshinshi ret Qanattyń aýyr soqqysyn alǵan B.Mahmýdovtyń múshkil halin baıqaǵan tóreshi jekpe-jekti toqtatyp, tenhıkalyq nokaýtpen jeńisti qazaq boksshysyna berdi. Sondaı-aq 85 kelide óner kórsetken «Astana arlandary» klýbynyń legıoneri Ramjon Mahmýdov, asa aýyr salmaqtaǵy bylǵary qolǵap sheberi Rýslan Myrsataev ta qarsylastarynan basym tústi.
Sonymen Azııa konferentsııasynyń komandalyq esebinde upaı sany boıynsha «Astana arlandary» ázirbaıjandyq komandamen teńesti, ekeýinde de 28 jeńisten bar. Al jeke jekpe-jekter boıynsha qazaq bylǵary qolǵap sheberlerinde 41, bakýlikterde 36 jeńis. Endi «Astana arlandary» koreılik, Baku Fires komandasy qytaılyq boksshylarmen qolǵap túıistiredi.
