«Astana arlandary» altynshy maýsymdaǵy tartysty básekelerge daıyn
ASTANA. QazAqparat - «Astana arlandarynyń» jigitteri WSB jobasy boıynsha ótetin altynshy maýsymdaǵy tartysty básekelerge daıyn. Bul jóninde London Olımpıadasynyń chempıony, «Astana Arlans» kásipqoı boks klýbynyń Bas dırektory Serik Sápıev málim etti.
Búkilálemdik boks serııasynyń (WSB) eki dúrkin jeńimpazy «Astana arlandary» komandasy VI maýsymǵa jańartylǵan quramda qatysqaly otyr. Bul joly ujymdaǵy bapkerler men boksshylardyń da ózgergenin baıqaýǵa bolady.
Ótken jyly komandanyń jeńimpaz atanýyna eleýli úles qosqan Danııar Eleýsinov, Jánibek Álimhanuly, Vasılıı Levıt, Ivan Dychko syndy boksshylar «Astana arlandarynyń» jańa quramyna engen joq. Óıtkeni Olımpıada lıtsenzııasyna ıe bolǵan Danııar men Vasılıı HHHІ jazǵy Olımpıada oıyndaryna tyńǵylyqty daıyndalatyn bolady. Al Jánibek pen Ivan jahandyq dodaǵa qatysýǵa joldama beriletin halyqaralyq týrnırlerde baq synamaq.
2016 jyly WSB jobasynda Qazaq eliniń namysyn qorǵap, sharshy alańǵa kimderdiń shyǵatyny «Astana Arlans» kásipqoı boks klýbynyń resmı saıtynda jarııalandy. Atap aıtqanda, «Astana arlandarynyń» jańa quramy mynadaı:
49 kılo salmaqta - Temirtas Júsipov, Mardan Berikbaev jáne Jomart Erjan;
52 kılo salmaqta - Oljas Sáttibaev, Azat Mahmetov jáne Mıras Jaqypov;
56 kılo salmaqta - Meıirbolat Toıytov, Nursultan Kósheǵulov jáne Nurbol Qaljanov;
60 kılo salmaqta - Zákir Safıýllın, Erjan Musafırov jáne Bekdáýlet Ibragımov;
64 kılo salmaqta - Samat Báshenov, Ashat Ýálıhanov jáne Sabyrjan Bekbergenov;
69 kılo salmaqta - Aslan Shymbergenov, Qanaǵat Maralov jáne Bekzat Halmetov;
75 kılo salmaqta - Meıirim Nursultanov, Rústem Sybaev jáne Erik Áljanov;
81 kılo salmaqta - Nurdáýlet Jarmanov, Álı Ahmedov jáne Arman Rysbek;
91 kıloǵa deıingi salmaqta - Muhamedjan Erkin jáne Rahman Áljanov;
91 kılodan joǵary salmaqta - Qamshybek Qońqabaev, Nurjan Bekzatov jáne Nursultan Amanjolov.
Atalǵan bylǵary qolǵap sheberleri de sharshy alańda myqty óner kórsetip júrgen sańlaqtar. Sondyqtan da osy boksshylarǵa úlken senim artylyp otyr.
Bapkerlerdiń ózgerisine oraı Serik Sápıev buǵan deıin komandany jattyqtyryp kelgen Marat Jaqıevtiń óz tálimgerlerin Olımpıadaǵa daıyndaıtynyna baılanysty aǵa bapkerlikten bosaǵanyn atap ótti.
«Astana Arlans» kásipqoı boks klýbynyń Bas dırektory Serik Sápıev: «Ulttyq quramanyń Rıo-de-Janeıro Olımpıadasynda sátti óner kórsetýi - bizdiń basty maqsatymyz. Sonymen qatar «Astana arlandarynyń» WSB jobasy boıynsha jeńimpaz ataýy úshin bar kúshimizdi salamyz»,- dep málimdep otyr.
2016 jyly jankúıerler asyǵa kútetin óte qyzyqty da mańyzdy boks jarystary bolmaq.
Aıta ketý kerek, 23 qańtar kúni «Astana arlandary» alǵashqy kezdesýin Ázerbaıjannyń «Baký Faırs» komandasyna qarsy ótkizedi. Alǵashqy tartysty báseke Qaraǵandy qalasynda ótedi.
