«Astana arlandary» «AQSh nokaýtshylaryn» 4:1 esebimen súrindirdi
ASTANA. 1 aqpan. QazAqparat - Dúnıejúzilik boks serııasy (WSB) básekesiniń bıylǵy maýsymdaǵy kezekti jekpe-jeginde «Astana arlandary» boks klýby qarsylastarynan taǵy ústem tústi.
Bul olardyń osy maýsymdaǵy jetinshi jeńisi.
Eske sala ketsek, «Arlandar» «Nokaýtshylardy» budan buryn Qazaqstanda 5:0 esebimen oısyrata utqan bolatyn. Qarsylastar óz alańynda ótken jekpe-jekte de buza almady "Astana arlandary" klýbynyń qamalyn.
Jarys bastalmaı turyp bizdiń komandanyń 2 upaımen alǵa shyqqanyn keshe jazǵan edik. Oǵan AQSh boksshylarynyń biriniń salmaǵynyń artyq bolýy, ekinshisiniń jarysqa kelmeı qalýy sebep bolǵan.
Osy upaıǵa boksshylarymyz jekpe-jekte taǵy eki upaı qosty. 54 kelidegi Habıbýlla-Ismaıl Ahýnov Braýlıo Avılla Hýaresti jeńse, 73 kelidegi Konstantın Snıgýr Ýılıam Ýılıamsti utty.
Ókinishke qaraı asa aýyr salmaqtaǵy boksshymyz Roman Kapıtonenko qarsylasy Ishtvan Bernatqa ese jiberip qoıdy.
Sonymen, esep: 4-1!
«Arlandar» klýbynyń tek kórsetilim úshin shyqqan eki boksshysy - Samat Báshenov (61 kg) pen Ehsan Rýzbahanı (85 kg) da qarsylastaryn aıqyn basymdylyqpen ýaqytynan buryn utty.
Endi 7 aqpanda «Astana arlandary» syrt alańda «Brıtanııa arystandary» komandasymen kezdesedi, dep habarlaıdy BAQ.kz.
