«Astana-Arqalyq» poıyzynda dúnıege sábı keldi
ASTANA. QazAqparat - «Astana-Arqalyq» baǵytynda qatynaıtyn № 603-604 poıyzynyń jolserikteri júkti jolaýshyny bosandyryp aldy, dep habarlaıdy QazAqparat.
«Jolaýshylar tasymaly» AQ baspasóz qyzmetiniń málimetinshe, vagon jolserikteri Baqyt Qaramanov pen Gúldarhan Shahanova poıyz bastyǵy Jandar Sıqymbaevpen birge mundaı jaǵdaıda qajetti barlyq sharany qabyldaǵan. Olar júkti kelinshekpen kórshiles jolaýshylardy basqa kýpege aýysýyn ótingen jáne olar túsinistik tanytqan. Osydan keıin jolserikter taza tósek-jabyndylaryn, medıtsınalyq qobdısha jáne tazartylǵan dáke ákelgen.
Poıyz mashınısi arqyly jedel járdem kóligi shaqyrylǵanymen olar joldyń jabyq bolýyna baılanysty jete almaǵan. Al Irchenko stansasynyń feldsheri Marııa Mokrıtskaıa poıyz bastyǵynyń ótinishimen júkti áıelmen Atbasar stansasyna deıin birge barýǵa kelisken. 7 naýryz kúni túngi saǵat 00-5-te áıel salmaǵy 3 keli 200 gram, boıy 50 sm deni saý balany dúnıege ákelgen. Qazirgi ýaqytta ana men bala Atbasardyń ortalyq perzenthanasynda jatyr. Olardyń densaýlyqtary qalypty.
«Balaǵa Ernar degen esim bermekpiz. Poıyz brıgadasynyń qyzmetkerleri men jolaýshylarǵa úshinshi balamnyń jaryq dúnıege kelýine kómekteskeni úshin rızashylyǵymdy bildiremin», - deıdi jas bosanǵan ana Áselhan Amanbaeva.
