«Astana-Arenada» fýtbol kórýge kimder kedergi jasap júr
ASTANA. QazAqparat - Parlament Májilisiniń jalpy otyrysynda depýtat Magerram Magerramov «Astana-Arena» stadıonyndaǵy fýtbol kezinde qyzmet kórsetý salasyndaǵy kemshilikterdi aıtty, dep habarlaıdy QazAqparat.
Osy oraıda ol Іshki ister mınıstri Qalmuhanbet Qasymov pen Mádenıet jáne sport mınıstri Arystanbek Muhamedıulynyń atyna tıisti depýtattyq saýal joldady.
Bul turǵyda M. Magerramov stadıonǵa ótetin týrnıketterde uzyn-sonar kezek jınalatynyn atap ótti.
«Kóbisi oıynǵa balalarymen nemese otbasymen keledi. Balalar men qyzdar stadıonǵa jan-jaqtan qysylyp áreń ótedi», - dedi ol. Sonymen qatar, depýtat stadıonǵa jetken kezde de kedergiler bolatynyn atap ótti. Tómendegi birinshi qatarlar men joǵarydaǵy qatarlarǵa jankúıerler jiberilmeıdi. Barlyq órkenıetti elderde qyzmet kórsetetin adamdar alańnyń shetine, baspaldaq ótkeline, sondaı-aq stadıondaǵy birinshi qatardyń shetki oryndaryna jaıǵasady. Bizde stıýardtar men Ulttyq gvardııa qyzmetshileri tómengi birinshi qatar men joǵary qabatta turady.
«Adamdar fýtbol kórýge keledi. Alaıda turǵyndar fýtboldyń ornyna aldyndaǵy qyzmetshilerdi, ıaǵnı alańdaǵy kórinisti jaýyp turǵan formadaǵy adamdardy ǵana kóre alady. Bul óz kezeginde jankúıerlerdiń narazylyǵyn týdyrady. Budan bólek, bapkerler quramy men oıynshylar oryndarynan keıin turǵan sektorlardaǵy kóriniste kemshilik bar.
Nege osy oryndar jabyq shatyrshamen jabdyqtalǵan? Bul nysannan keıingi qatarlar paıdalanylmaýy múmkin. Óıtkeni osy qatarlarda otyrǵandar eshteńe kóre almaıdy. Barlyǵyn eseptesek, 1000 tarta oryn paıdalanylmaı qalady. Osy tektes kemshilikter saldarynan jankúıerler múddeleri múldem nazarǵa alynbaı otyr», - dedi M. Magerramov.
Osyǵan baılanysty depýtat aldyńǵy qatarly eýropalyq elderdiń tájirıbesin zertteý qajettigin atap ótti.
