«Astana Arena», «Barys Arena» men «Alaý» senimgerlik basqarýdan shyǵaryla ma

ASTANA. KAZINFORM – «Astana Arena» stadıony, «Barys Arena» sport kesheni men «Alaý» muz saraıy qanshalyqty tıimdi basqarylyp otyr? Olar senimgerlik basqarýdan shyǵarylýy múmkin be? Bul suraqqa Astana qalasynyń Dene shynyqtyrý jáne sport basqarmasy jaýap berdi.

Bıyl qańtar aıynda Básekelestikti qorǵaý jáne damytý agenttiginiń Astana qalasy boıynsha departamenti «Astana qalasynyń aktıvter jáne Memlekettik satyp alý basqarmasy» MM is-áreketterinde «Astana Arena» stadıonyn, «Barys Arena» sport keshenin jáne «Alaý» muz saraıyn satyp alý quqyǵynsyz senimgerlik basqarýǵa berý kezinde ketken monopolııaǵa qarsy zańnamany buzý belgilerin anyqtaǵan edi. 

- Basqarma 2020 jyly atalǵan obektilerdi satyp alý quqyǵynsyz senimgerlik basqarýǵa berý boıynsha tender ótkizgen. Tender nátıjeleri boıynsha «Mtex management» JShS jeńimpaz dep tanylyp, onymen 15 jylǵa shart jasalǵan. Zańnamaǵa sáıkes, tenderdi ótkizý básekelestikti damytý qaǵıdattaryn saqtaı otyryp, barlyq áleýetti basqarýshylar úshin qatysýdyń teń jaǵdaılaryn qamtamasyz etýge tıis. Alaıda, bul sport keshenderin berýge tender jarııalanǵan kezde qujattamada qatysýshylar sheńberin shekteıtin talaptar jazylǵan, - dep atalyp ótken agenttik aqparatynda.

Osy oraıda, elordanyń Dene shynyqtyrý jáne sport basqarmasy «Mtex management» kompanııasynyń 2020 jyldan bergi qyzmetine taldaý jasalǵanyn atap ótedi. 

- 2024 jyly Qazaqstan Respýblıkasy Úkimetiniń 2012 jylǵy 4 jeltoqsandaǵy №1546 qaýlysymen bekitilgen «Memlekettik múlikti basqarý tıimdiligin monıtorıngileý qaǵıdalaryn bekitý týraly» qaýlysyna sáıkes, Astana qalasy ákimdiginiń tapsyrysy boıynsha Monıtorıng obektilerin basqarýdyń tıimdiligine keshendi taldaý júrgizildi. Taldaý óndiristik-tehnıkalyq, tehnologııalyq, qarjylyq-ekonomıkalyq, quqyqtyq, ekologııalyq jáne ózge de parametrlerdi qamtydy. Zertteý nátıjesinde múliktiń damý boljamdylyǵy turǵysynan onyń jaı-kúıine keshendi baǵa berildi. Sarapshylardyń qorytyndysyna qaraǵanda, «Mtex management» JShS tarapynan memlekettik múlikti basqarý tıimdi dep tanyldy, - delingen elordalyq basqarmanyń Kazinform agenttigine bergen jaýabynda.

Sporttyq nysandardy basqarý sapasyn arttyrý jáne ońtaılandyrý nátıjesinde memlekettik bıýdjettiń shyǵyndary qysqarǵany anyqtalǵan.

- Bul nysandardy senimgerlik basqarýǵa berýdiń negizgi maqsattarynyń biri osy edi. Al Básekelestikti qorǵaý jáne damytý agenttigi tarapynan aıtylǵan máselelerge toqtalsaq, naqty zań buzý faktileri anyqtalǵan joq, ıaǵnı zańnamaǵa sáıkes quqyqtyq baǵa berýdi talap etetin belgiler ǵana tirkeldi. Osyǵan baılanysty bul másele tıisti qaraý satysynda tur, - dep naqtylady basqarmadan.

Basqarma jaýabynda kórsetilgendeı, naqty qorytyndylar tıisti talqylaý nátıjeleri boıynsha belgili bolmaq.