Astana árdaıym aýqymdy jumystardyń bastaýynda turýǵa tıis - Prezıdent

ASTANA. KAZINFORM - Memleket basshysy Qasym-Jomart Toqaev Astanany damytý jónindegi keńeste sóılegen sózinde elde júrgizilip jatqan saıası reformalarǵa toqtaldy.

-Biz reformalardy jalǵastyra beremiz. Men Joldaýymda bir palataly Parlament qurý týraly bastama kóterdim. Bul – sońǵy jyldary qolǵa alynǵan aýqymdy ózgeristerdiń zańdy jalǵasy. 

Túpkilikti sheshim jalpyhalyqtyq referendýmda qabyldanady. Azamattarymyz maquldasa, Ata Zańǵa kóptegen ózgeris engiziledi. Túzetýlerdiń aýqymyn eskersek, muny jańa Konstıtýtsııa qabyldaýmen birdeı qadam deýge bolady. Biz ozyq oıly ult retinde bolashaqqa senimmen qaraımyz,-dedi Prezıdent.

Sondaı-aq aldymyzda bıik maqsattar turǵanyn aıtqan Memleket basshysy Qazaqstannyń tranzıttik áleýetin arttyrý qajettigin jetkizdi.

-Tolyq tsıfrlyq memleket bolýymyz kerek. Energetıka, aýyl sharýashylyǵy salalaryn damytý qajet. Munyń barlyǵy – bir kúndik sharýa emes. Biz ortaq múdde jolynda kúsh biriktirsek, osy maqsattyń bárine jetemiz. 

Astana árdaıym aýqymdy jumystardyń bastaýynda turýǵa tıis. Elordamyz basqa aımaqtarǵa barlyq jaǵynan úlgi bolýy kerek. Aıtylǵan mindetterdiń barlyǵy ýaqtyly ári sapaly oryndalýǵa tıis,-dedi Qasym-Jomart Toqaev.

Memleket basshysy osyǵan deıin qorshaǵan ortany qorǵaý – strategııalyq másele ekenin aıtqan bolatyn.