«Astana» - APOEL fýtbol matchy kezinde elordada jol qozǵalysy shekteledi
ASTANA. QazAqparat - Tamyzdyń 18 kúni saǵat 22:00-de "Astana Arena" stadıonynda Chempıondar lıgasynyń pleı-off kezeńindegi birinshi fýtbol matchy - "Astana" men APOEL (Kıpr) arasyndaǵy kezdesý ótedi. "Astana Arena" stadıonyna jankúıerler bılet boıynsha kirgiziledi.
Osyǵan oraı, saǵat 19.00-den bastap is-sharanyń sońyna deıin qoǵamdyq kólikter men taksı kólikterinen basqa kólik quraldarynyń qozǵalysy Qabanbaı batyr jáne Turan dańǵyldarynyń boıynan, Kereı-Jánibek handar kóshesinen Hýseın Ben Talal kóshesine deıin shekteledi. Orynbor kóshesi boıymen aınalyp ótýge keńes beriledi.
Astananyń Halyqaralyq áýejaıyna barýdy josparlaǵan azamattarǵa jáne sol mańdaǵy poselkelerdiń turǵyndaryna aınalyp ótý marshrýttaryn aldyn-ala josparlap alý qajet.
Astana qalasy ІІD Ákimshilik polıtsııa basqarmasy avtokólik ıelerine fýtbol matchyna qoǵamdyq kólikpen kelýge keńes beredi. Іs-shara ótkiziletin orynǵa qozǵalys esh kedergisiz júzege asyrylady.
Sonymen qatar, ótkiziletin is-shara aýmaǵynda Ákimshilik polıtsııa basqarmasynyń evakýatorlary jumys istep, turaq erejesin buzǵan avtokólik ıeleri úshin kólikterin aıyppul turaǵyna jetkizýmen ákimshilik shara túri qoldanylatyn bolady.
Kórermenderdi ákimshilik bergen avtobýstarmen is-shara ótetin orynǵa aparý jáne jınaý, belgili oryndardan alyp ketý júzege asyrylady. Ol jerler: «Qazaqstan» sport kesheni, tsırk, «Haziret Sultan» jáne «Nur Astana» meshitteriniń, Q.Muńaıtpasov atyndaǵy alańnyń jáne Aqjaıyq kóshesiniń boıyndaǵy «Jastar» teatrynyń (burynǵy K.Baıseıitov atyndaǵy ulttyq opera jáne balet teatry) turaqtary.
Qoǵamdyq tártipti qorǵaý jáne jol qozǵalysy qaýipsizdigin qamtamasyz etý úshin fýtboldyq match ótkizý kezinde Qazaqstan Respýblıkasy ІІM Ulttyq gvardııasynyń áskerı qyzmetkerlerin tartýymen 2 myńǵa jýyq polıtsııa qyzmetkerleri qatysady.
