«Astana-Almaty» sýpermarafonyna qatysýshylar 1300 km júgirdi

Marafon 30 qarashada Astanadaǵy «Otan ana» alańynda saǵat 10:30-da bastaldy. 6 kún men 5 tún boıy qatysýshylar 1300 km qashyqtyqty júgirip ótti. Qatysýshylar Almatydaǵy «Máńgilik alaý» mańynda 5 jeltoqsan kúni saǵat kúndizgi 11-00-de máre syzyǵyn kesip ótti. Sýpermarafonǵa qatysýshylardyń 80% qurylysshylar.

«Sýpermarafonnyń negizgi mindeti - salaýatty ómir saltyn ustanýdy qoldaý. Biz adamdardyń sportqa degen kózqarasyn jaqsartqymyz keledi. Júgirýdi saýatty ári josparly túrde uıymdastyrsa, 1300 km-di árkim-aq júgirip shyǵa alady. Buryn marafon júgirý degen qoldan kelmeıtin isteı kórinetin. Qazir ár onynshy qazaqstandyq 5 nemese 10 km-ge, kóbi jartylaı marafon 21 km-ge júgiredi. Mundaı marafondardy júgirgen adam sýpermarafonǵa da qatysa alady. Chellendjdi sportshylarǵa, áýesqoı sportshylar men kásipkerlerge joldaımyz. Biz qysqy sýpermarafondy júgirip óttik. Almatylyqtar basqasyn ótkizse bolady. Almatylyqtar estafetamyzdy jalǵastyrady dep senemiz», - dedi Qazaqstan qurylysshylar odaǵynyń tóraǵasy Talǵat Erǵalıev.

Sýpermarafonǵa Astanadan 10 adam qatysyp, ár qatysýshy kúnine kem degende 20 km júgirip otyrǵan. Jel ótpeıtin jyly kıim kıgen olar qatań aýa raıyna tótep bere aldy.

«Kúnine bárimiz 200 km-ge jýyq qashyqtyqty júgirip otyrdyq. Denesi shynyqqan adamǵa bul ortasha deńgeıdegi aýyrlyq. Jolda Qaraǵandyda, Balqash pen Saryshaǵanda, Prıozersk pen Shaǵanda, Shamalǵan men Qaskeleńde boldyq», - dedi Talǵat Erǵalıev.

«Jastarǵa keıde kompıýter men smartfonnan bir aýyq dem alyp, densaýlyqqa kóńil bólý keregin úlgi etkimiz keledi. Biz sııaqty úlken qashyqtyqqa kirisip ketpese de, ózderiniń chellendjerin oılap tapsa bolady. Sonda ulttyń densaýlyǵy myqty, kúshi myǵym, bilimdi, belsendi bolady», - dep Talǵat Erǵalıev sózin aıaqtady.

Marafonǵa qatysýshylar Іshki ister mınıstrligine, Astana, Almaty qalalary men Qaraǵandy, Jambyl oblysynyń ákimdikterine alǵys bildirdi.

Tańsholpan Begalyqyzy