«Astana-Almaty» poıyzymen bolǵan apat qozǵalys kestelerine áser etpeıdi – QTJ

ASTANA. QazAqparat - Shý aýdanynda jolaýshylar poıyzy vagondarynyń aýdarylýy Astana-Almaty baǵytyndaǵy poıyzdardyń qozǵalys kestesine áser etpeıdi. Bul týraly QazAqparat tilshisi «Qazaqstan temir joly» AQ-nyń baspasóz qyzmetine silteme jasaı otyryp habarlaıdy.

Taratylǵan málimetke sáıkes, «Almaty-1» temirjol vokzalynda №10 «Astana-Almaty» poıyzynyń jolaýshylaryna qajetti barlyq kómek kórsetilgen. №10 poıyzdyń 400-ge tarta jolaýshysy Almatyǵa jetkizilgen.

«Almaty-1» temirjol vokzalyna kelgen jolaýshylarǵa medıtsınalyq kómek kórsetildi. 10 jedel járdem qyzmetimen jáne vokzaldyń medıtsınalyq pýnktimen kezekshilik uıymdastyryldy», - delingen habarlamada.

Jolaýshylarǵa sonymen qatar, qosymsha aqparattyq-anyqtamalyq aýmaqta temirjol bıletteriniń qunyn qaıtarý boıynsha keńester berilgen.

«Shý stansysyna, ıaǵnı belgilengen pýnktke adamdardy jedel túrde jetkizý úshin 7 jolaýshylar vagony jóneltildi», - deıdi «QTJ-Júk tasymaly» AQ Almaty fılıalynyń dırektory Sársebek Japarov.

Jolaýshylardyń habarlaýynsha, oqıǵa bolǵannan keıin jolserikter olardy birden vagondardan syrtqa alyp shyqqan. Arada biraz ýaqyt ótkennen keıin temirjolshylar adamdardy Almatyǵa basqa poıyzben jóneltý múmkindigin uıymdastyrǵan.

«Atalǵan oqıǵa Astana-Almaty ýchaskesindegi poıyzdar qozǵalysynyń kestesine áser etpeıdi», - delingen habarlamada.

Eske sala ketsek, Astanadan Almatyǵa bara jatqan jolaýshylar poıyzy apatqa ushyraǵan bolatyn. Bir jasóspirim bala mert boldy. 

«Qazaqstan temir joly» ulttyq kompanııasy sál keıinirek resmı málimdeme jasap, oqıǵanyń shyǵý sebebin tekseretin arnaıy komııssııa qurylǵanyn jarııa etti. Qylmystyq is qozǵaldy. 

Poıyzda bolǵan barlyq 832 jolaýshy belgilengen pýnktterine jetkizildi.