Astana, Almaty qalalarynda, Aqtóbe, Qostanaı, Pavlodar oblystarynda barlyq orta mektep avtomatty órt dabylymen jabdyqtalǵan
ASTANA. 22 tamyz. QazAqparat - Astana, Almaty qalalarynda, Aqtóbe, Qostanaı, Pavlodar oblystarynda barlyq orta mektep avtomatty órt dabylymen jabdyqtalǵan. Bul týraly búgin QR TJM Órtke qarsy qyzmet komıteti Memlekettik órt baqylaý jáne anyqtaý basqarmasynyń bas mamany Sáýle Ahmetova málim etti.
Bas mamannyń sózine qaraǵanda, mektepterdiń órt avtomatıkasy qondyrǵylarymen jabdyqtalýy deńgeıiniń eń tómengi kórsetkishi Atyraý oblysynda tirkelip otyr. Bul óńirde atalǵan kórsetkish 42 paıyz bolsa, Batys Qazaqstan oblysynda 50, Almaty oblysynda 57 paıyzdy quraıdy. Bul rette órt qaýipsizdigi talaptarynyń óreskel buzylýy negizinen aýyldyq jerlerdegi mektepterde oryn alýda. Óıtkeni aýyldyq mektepterdiń kópshiligi 30-60-shy jyldary salynǵan. Degenmen mınıstrlik ókili jyl saıyn júrgizilgen jumystyń arqasynda bilim berý nysandaryn órtten qorǵaý deńgeıi jaqsara túskendigin atap ótti.
«2012 jylǵy 1 qańtardaǵy jaǵdaı boıynsha respýblıkada barlyǵy 5996 mektep órt avtomatıkasymen jabdyqtalǵan. Bul olardyń jalpy sanynyń 80 paıyzyn quraıdy. 2011 jylmen salystyrǵanda mektep ǵımarattarynyń órt avtomatıkasy júıesimen jabdyqtalýy 12 paıyzǵa óskeni baıqalady. Máselen, Astana, Almaty qalalarynda Aqtóbe, Qostanaı, Pavlodar oblystarynda barlyq orta mektep avtomatty órt dabylymen tolyqtaı, al Jambyl, Soltústik jáne Ońtústik Qazaqstan oblystarynda 80 paıyz jabdyqtalǵan», - dedi ol.
Jalpy S. Ahmetovanyń atap ótýinshe, atalǵan nysandarda órtke qarsy rejimdi qamtamasyz etýdegi oqý oryndary basshylarynyń salaqtyǵy da baıqalyp qalady. Mine, sonyń saldarynan 2013 jyldyń ótken kezeńinde 16 órt tirkelgen. Al odan kelgen materıaldyq shyǵyn 7 mln. 674 myń teńgeni quraıdy. Biraq, ótken jyldyń sáıkes kezeńimen salystyrǵanda órt sany 45 paıyzǵa azaıyp otyr.
