Astana, Almaty qalalary men oblys ortalyqtarynan tegin jer ýchaskelerin berý toqtatylady
ASTANA. 28 aqpan. QazAqparat - Astana men Almaty qalalarynan, sondaı-aq oblys ortalyqtarynan jeke turǵyn úı qurylysyna tegin jer ýchaskelerin berý toqtatylady. Bul týraly búgin Májiliste «Qazaqstan Respýblıkasynyń keıbir zańnamalyq aktilerine jer qatynastaryn retteý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda málim boldy.
«Zań jobasymen usynylǵan taǵy bir norma jer ýchaskelerin jeke turǵyn úı qurylysy úshin jeke menshikke tegin berýdi Astana, Almaty qalalary men oblys ortalyqtaryna qarastyrmaýdy kózdeıdi. Jalpy Qazaqstan Respýblıkasynda ásirese úlken qalalarda jeke turǵyn úı qurylysyna jer berý asa ózekti ári problemaly máseleniń biri. Jer kodeksine sáıkes, respýblıka azamattary tegin negizde jeke turǵyn úı qurylysy úshin 0,10 gektar jer ýchaskesin bir ret alýǵa quqyly. Ókinishke qaraı, jurtshylyq bul normany jerdi tegin ári tez alýǵa bolatyn, sondaı-aq sonyń arqasynda qosymsha tabys tabatyn kepil retinde qabyldap keldi», - deıdi Óńirlik damý mınıstrligi Jer resýrstaryn basqarý komıtetiniń tóraǵasy Qadyrhan Otarov. Onyń aıtýynsha, jurtshylyqtyń sondaı túsiniginiń ózi iri qalalarda jer ýchaskelerin alýǵa nıettenýshilerdiń sanyn kúrt ósirip tastady.
«Óz quqylaryn bilgendikten, azamattar memleketten tegin jer bólip berýdi talap etip júr. Al olardyń talaby qanaǵattandyrylmasa, onda óz erikterimen, memlekettiń aralasýynsyz-aq jerdi basyp alyp, óz quqyqtaryn júzege asyrmaqshy bolǵan jaıttar da kezdesti», - deıdi komıtet tóraǵasy. Onyń aıtýynsha, álgindeı óreskel áreketter qoldanystaǵy zańnamany jappaı buzýǵa, áleýmettik jaǵymsyz qubylystardy týdyrýǵa ákep soqtyrǵan. Al jańa norma osyndaı olqylyqtardyń ornyn toltyrmaqshy.
