Astana, Almaty jáne Shymkenttiń jeke dızaın-kody engizilmek
ASTANA. KAZINFORM — Búgin Parlament Májilisinde «Qazaqstan Respýblıkasynyń keıbir zańnamalyq aktilerine astanany jáne respýblıkalyq mańyzy bar qalalardy damytý máseleleri boıynsha ózgerister men tolyqtyrýlar engizý týraly» zań jobasy tanystyryldy.
Zań jobasy Astana qalasyn damytý máseleleri jónindegi keńeste berilgen Memleket basshysynyń hattamalyq tapsyrmasyn, sondaı-aq Prezıdent Ákimshiligi Basshysynyń astanany damytý tásilderin respýblıkalyq mańyzy bar barlyq qalalarǵa taratý jónindegi qararyn oryndaý úshin ázirlendi. Zań jobasy arqyly 1 kodekske jáne 6 zańǵa túzetý engiziledi. Zań jobasy jer qatynastary, sáýlet jáne qurylys, kóshi-qon, jarnama, ekologııa jáne basqa da salalardaǵy máselelerdi sheshýge baǵyttalǵan.
«Syrtqy jarnamany joldar men kóshelerdi boıaý arqyly ornalastyrý qalalardyń estetıkalyq kelbetine teris áser etedi. Sondaı-aq, qalanyń syrtqy kelbetiniń nasharlaýyna qoǵamdyq oryndarda aýdıo jarnamanyń keń taralýy sebep bolyp otyr. Qazirgi kezde atalǵan áreketter ereje buzý áreketine jatpaıdy jáne zańnamada oǵan qarsy eshqandaı ákimshilik sharalar kózdelmegen», - dedi Ulttyq ekonomıka vıtse-mınıstri Baýyrjan Omarbekov.
Osylaısha, qalalardyń syrtqy kelbeti boıynsha máselelerin sheshý maqsatynda kelesi zańnamalyq ózgerister usynyldy:
- «Jergilikti memlekettik basqarý jáne ózin-ózi basqarý týraly» Zańyna respýblıkalyq mańyzy bar qala men astana máslıhatynyń quzyretin dızaın-kodty bekitý jónindegi normamen, al ákimdikterdiń quzyretin statsıonarlyq emes obektilerdi ornatý men jumys isteýi boıynsha qaǵıdalardy bekitý jónindegi normamen keńeıtý;
- «Astana mártebesi týraly» Zańyna elordada biryńǵaı dızaın-kodty engizý jáne onyń jalpy erejelerin aıqyndaý;
- «Jarnama týraly» Zańy aıasynda: ǵımarattardyń/turǵyn úıdiń menshik ıesine talaptardy buza otyryp ornatylǵan jarnama obektisine demontaj jónindegi talaptardy qoldaný;
- ashyq keńistikte aýdıo jarnamany taratýǵa tyıym salý;
- trotýarlarda, velojoldarda, avtojoldarda jáne kóshelerde syrtqy jarnamany ornalastyrýǵa tyıym salý.
Atalǵan normalardy Ákimshilik quqyq buzýshylyq týraly kodeksine engizý máselesi pysyqtalyp jatyr.
