Astana, Almaty jáne Shymkentte qoqystan elektr óndiretin zaýyttar salynyp jatyr
ASTANA. Qazaqstanda Astana, Almaty jáne Shymkent qalalarynda qaldyqtardy energetıkalyq kádege jaratý zaýyttaryn salý jobalary júzege asyrylyp jatyr. Bul týraly Qaldyqtardy basqarý departamentiniń dırektory Rýslan Túkenov Astanada ótip jatqan «Jasyl energııa jáne qaldyqtardy qaıta óńdeý» (GEWR’26) X Eýrazııalyq bıznes-forýmynda málim etti.
Onyń aıtýynsha, bul ınvestıtsııalyq jobalardyń jalpy quny 293 mlrd teńgeni quraıdy.
— Qazirgi ýaqytta Astana, Almaty jáne Shymkent qalalarynda qaldyqtardy energetıkalyq kádege jaratý zaýyttaryn salý boıynsha ınvestıtsııalyq jobalar júzege asyrylyp jatyr. Jobalardyń jalpy ınvestıtsııa kólemi 293 mlrd teńgeni quraıdy. Bul jobalar qaldyqtardy kómý kólemin edáýir qysqartyp qana qoımaı, zamanaýı tehnologııalardy paıdalaný arqyly elektr energııasyn óndirýge múmkindik beredi, — dedi Rýslan Túkenov.
Onyń sózinshe, aldaǵy ýaqytta mundaı jobalardy Qazaqstannyń basqa oblys ortalyqtarynda da kezeń-kezeńimen iske asyrý josparlanyp otyr.
Aıta keteıik, Qazaqstan 2030 jylǵa qaraı turmystyq qaldyqtardy qaıta óńdeý deńgeıin 40%-ǵa deıin arttyrýdy josparlap otyr.
