Astana, Almaty jáne Shymkent turǵyndary sý únemdeı bastady
ASTANA. KAZINFORM - Respýblıkalyq mańyzy bar qalalarda halyq sanynyń ósýine qaramastan, bir adamǵa shaqqandaǵy ortasha sý tutyný kólemi azaıdy. Mysaly, 2024 jyly Astana turǵyny jylyna orta eseppen 70,9 tekshe metr sý tutynsa, 2025 jyly bul kórsetkish 67,8 tekshe metrge deıin tómendedi.
QR Sý resýrstary jáne ırrıgatsııa mınıstrligi baspasóz qyzmetiniń habarlaýynsha, sondaı-aq Almatyda bir adamǵa shaqqandaǵy sý tutyný kólemi jylyna 73,3 tekshe metrden 69,1 tekshe metrge deıin qysqardy. Al Shymkentte bul kórsetkish 63,7 tekshe metrden 62,5 tekshe metrge deıin tómendegen.
Sý tutyný kóleminiń azaıýy sý resýrstaryna uqypty qaraý mádenıetiniń birtindep qalyptasyp kele jatqanyn jáne azamattardyń sýdy únemdeýdiń mańyzy jaıly habardarlyǵynyń artqanyn kórsetedi.
Qoǵamda sýdy únemdeý mádenıetin qalyptastyrý maqsatynda mınıstrlik turmystyq jaǵdaıda sýdy únemdeý jónindegi ádistemelik usynymdar ázirledi.
-Osy usynymdar qamtylǵan aqparattyq materıaldar 145 nysanda ornalastyryldy. Olardyń qatarynda 18 áýejaı, 22 temirjol vokzaly, 20 avtovokzal, 75 saýda-oıyn-saýyq ortalyǵy jáne 10 bilim berý uıymy bar. Bul sharalar respýblıkalyq mańyzy bar úsh qalada, 17 oblys ortalyǵynda jáne oblystyq mańyzy bar úsh qalada júzege asyryldy. Sonymen qatar balalar men jastar arasynda sý resýrstaryna uqypty kózqaras qalyptastyrýǵa baǵyttalǵan «Sýdy únemde - bolashaqty saqta» atty aýqymdy joba iske asyrylyp jatyr,-delingen habarlamada.
Sondaı-aq onda byltyrdan beri Qazaqstannyń bilim berý uıymdarynda Sý resýrstary jáne ırrıgatsııa mınıstrliginiń ókilderi, shet memleketterdiń elshileri, halyqaralyq uıymdardyń basshylary men Parlament depýtattarynyń qatysýymen sýdy únemdeýge arnalǵan ashyq sabaqtar men ekosaǵattar ótkizilip keletini aıtylǵan. Joba aıasynda mektep, kolledj jáne joǵary oqý oryndarynyń 3,3 mıllıonnan astam bilim alýshysy qamtyldy.
-Bul jumys mindetti túrde jalǵasady. Jyl sońyna deıin birqatar jańa bastamany júzege asyrý josparlanyp otyr. Olardyń qatarynda pedagogterge arnalǵan ádistemelik resýrsty ázirleý jáne sýdy únemdeý máselelerine arnalǵan ata-analardyń respýblıkalyq forýmyn ótkizý bar, - dep atap ótti Sý resýrstary jáne ırrıgatsııa vıtse-mınıstri Talǵat Momyshev.
Osyǵan deıin bilim alýǵa umtylǵan jastar arasynda da sý salasyna qyzyǵýshylyq artyp kele jatqany týraly jazdyq.
