Astana, Almaty jáne Qosshyda júrgizýshisiz júretin kólikter synaqtan ótedi
ASTANA. KAZINFORM — Qazaqstanda júrgizýshisiz jáne jartylaı avtomattandyrylǵan kólikterdi engizýge arnalǵan pılottyq jobany iske asyrý qaǵıdalary bekitildi. Tıisti birlesken buıryqqa Jasandy ıntellekt jáne tsıfrlyq damý mınıstrligi men Kólik mınıstrligi sondaı-aq Іshki ister mınıstrligi qol qoıdy. Bul týraly vedomstvonyń baspasóz qyzmeti málim etti.
Jańa qaǵıdalar shartty jáne joǵary deńgeıdegi avtomattandyrylǵan basqarýy bar kólikterdi elimizde synaqtan ótkizý tártibin aıqyndaıdy. Sondaı-aq pılottyq jobaǵa qatysýshylarǵa, kólik quraldaryna, olardy paıdalanýǵa qoıylatyn talaptar, qaýipsizdik sharalary men memlekettik baqylaý tetikteri belgilengen.
Pılottyq joba úsh jyl boıy Astana, Almaty jáne Qosshy qalalarynda júzege asyrylady. Avtonomdy kólikter aldymen arnaıy polıgondarda, keıin ýákiletti organdar bekitken belgili bir marshrýttarda synaqtan ótedi.
Qaǵıdalarda avtomattandyrý deńgeıine qaraı talaptar da naqty ajyratylǵan. Máselen, shartty avtomattandyrylǵan kólikterde júrgizýshi mindetti túrde salonda bolyp, qajet bolǵan jaǵdaıda basqarýdy óz qolyna alýǵa daıyn turýy tıis. Al joǵary deńgeıdegi avtonomdy kólikterdiń ishinde júrgizýshiniń bolýy mindetti emes. Biraq mundaı kólikterdi qashyqtan baqylaıtyn operator bolýy qajet.
Qaýipsizdikke erekshe nazar aýdarylǵan. Avtonomdy kólikter oqıǵalardy tirkeıtin júıemen, beınekameralarmen, tótenshe jaǵdaıda avtomatty basqarýdy óshiretin tetikpen, arnaıy «Avtonomdy basqarý» belgisimen jáne baǵdarlamalyq qamtamasyz etýdi kıbershabýyldan qorǵaıtyn júıelermen jabdyqtalýy kerek.
Qujatta avtonomdy kólikterdi taksı qyzmetinde jáne turaqty emes jolaýshylar tasymalynda paıdalaný tártibi de qarastyrylǵan. Sonymen qatar pılottyq jobaǵa qatysýshylardyń azamattyq-quqyqtyq jaýapkershiligin mindetti saqtandyrý talaptary belgilengen.
Jasandy ıntellekt jáne tsıfrlyq damý vıtse-mınıstri Ǵızzat Baıtursynovtyń aıtýynsha, pılottyq joba avtonomdy kólik tehnologııalaryn naqty jol jaǵdaıynda synaýǵa, olardy retteýdiń tıimdiligin baǵalaýǵa jáne osy saladaǵy zańnamany jetildirýge múmkindik beredi.
Birlesken buıryqtyń tolyq mátini bes jumys kúni ishinde «Ádilet» aqparattyq-quqyqtyq júıesinde jarııalanady.
Aıta keteıik, buǵan deıin Almaty men Astanada júrgizýshisiz taksı jobasy iske qosylatynyn jazdyq.
