Astana, Almaty, Shymkent jáne Aqtóbe áýejaılary álemdik deńgeıdegi mýltımodaldy ortalyqtarǵa aınalady
ASTANA. KAZINFORM — Astanada 2025 jyly «Nursultan Nazarbaev» halyqaralyq áýejaıyn jańǵyrtý jobasy bastaldy, onyń sheńberinde $1,1 mlrd. kóleminde ınvestıtsııalar tarta otyryp, ekinshi ushý-qoný jolaǵyn, sondaı-aq úshinshi jolaýshylar jáne júk termınalyn salý kózdelgen. Bul týraly Úkimettiń baspasóz qyzmeti habarlady.
Prezıdent Qasym-Jomart Toqaevtyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýyn júzege asyrý aıasynda Astana, Almaty, Shymkent jáne Aqtóbe qalalaryndaǵy elimizdiń jetekshi áýejaılary logıstıkalyq qyzmetterdiń tolyq spektrin usynatyn zamanaýı mýltımodaldy ortalyqtar retinde damyp jatyr.
Astanada 2025 jyly «Nursultan Nazarbaev» halyqaralyq áýejaıyn jańǵyrtý jobasy bastaldy, onyń sheńberinde $1,1 mlrd. kóleminde ınvestıtsııalar tarta otyryp, ekinshi ushý-qoný jolaǵyn, sondaı-aq úshinshi jolaýshylar jáne júk termınalyn salý kózdelgen. Sondaı-aq, ındýstrııaldy-logıstıkalyq aımaǵy, bıznes-ortalyqtary, qonaq úıleri jáne saýda alańdary bar «Aerotropolıs» kópfýnktsıonaldy kesheni qurylatyn bolady.
Almaty áýejaıy 2050 jylǵa deıingi damýdyń bas jospary boıynsha jańǵyrtylmaq. Búginde birinshi kezeń bastalyp ketti, ol ishki reıster termınalynyń rekonstrýktsııasyn, taksı jolyn salýdy, UQJ men otyn ınfraqurylymyn jańartýdy, zamanaýı júk perrondary men tehnıkalyq qyzmet kórsetý angaryn qurýdy qamtıdy.
Shymkentte 2024 jyldyń 25 jeltoqsanynda aýdany 40 myń sharshy metr bolatyn jańa jolaýshylar termınaly ashylyp, áýejaıdyń ótkizý qabileti jylyna 800 myńnan 6 mln jolaýshyǵa deıin artty. Aldaǵy jyldary uzyndyǵy 3,5 myń metr bolatyn jańa ushý-qoný jolaǵyn salý josparlanǵan. Sonymen birge áýejaıdy «Ońtústik» AEA aýmaǵymen baılanystyratyn mýltımodaldy hab qurý boıynsha jumystar júrgizilip jatyr.
Aqtóbede bıyl aýdany 15 myń sharshy metr bolatyn kópfýnktsıonaldy logıstıkalyq habtyń qurylysy bastaldy. Munda qazirgi zamanǵy qoımalar, sonyń ishinde qaýipti jáne tez buzylatyn júkter úshin, tońazytqysh kameralar men baǵaly taýarlarǵa arnalǵan sektsııalar qarastyrylatyn bolady.
Sonymen qatar Úkimet eldiń iri áýejaılarynyń aýmaǵynda arnaıy ekonomıkalyq aımaqtardyń shekaralaryn keńeıtý týraly sheshim qabyldady. Bul ınvestorlardy tartýǵa, ónerkásip pen logıstıkany damytýǵa, sondaı-aq Qazaqstannyń áýe toraptaryn ulttyq ekonomıka úshin qýatty ósý núktelerine aınaldyrýǵa múmkindik beredi.
Aıta ketelik respýblıkalyq joldardyń jaǵdaıy 93%-ǵa deıin jaqsardy.