Astana, Almaty kóshelerinde aıqaılap júrip jarnama taratýǵa tyıym salynýy múmkin

ASTANA. KAZINFORM – Astana men respýblıkalyq mańyzy bar qalalardyń ashyq keńistiginde aýdıo jarnama taratýǵa tyıym salynýy múmkin. Májiliste birinshi oqylymda talqylanyp jatqan zań jobasynda osyndaı norma bar.

— Sonymen qatar, qalanyń syrtqy kelbetiniń nasharlaýyna qoǵamdyq oryndarda aýdıo jarnamanyń keń taralýy sebep bolyp otyr. Búgingi tańda atalǵan áreketter zań buzýshylyqqa jatpaıdy jáne zańnamada eshqandaı ákimshilik sharalar kózdelmegen. Osylaısha ashyq keńistikte aýdıo jarnamany taratýǵa tyıym salý usynylady, — dedi zań jobasyn tanystyrǵan Premer-mınıstrdiń orynbasary — Ulttyq ekonomıka mınıstri Serik Jumanǵarın.

Depýtat Rınat Zaıytov Astanada Muqaǵalı Maqataevtyń óleńderin aıtyp júrip jarnama jasaıtyn adamdar bar eken, Almatyda án arqyly jarnama jasaıtyn ujymdardy biletinin aıtty. Onyń sózinshe, mundaı áreketke turǵyndar kórneki jarnamaǵa aqshasy bolmaǵandyqtan barady. Sondyqtan mundaı tyıym orynsyz dep esepteıtinin aıtty.

Astana qalasy ákiminiń orynbasary Ersin Ótebaev mundaı norma atalǵan qala turǵyndarynyń shaǵymynan keıin qujatqa engizilgenin aıtty.

— Al siz aıtqan jekelegen jaǵdaılardy jeke zertteýge bolady. Zań jobasy búgin bekitiledi degen sóz emes qoı. Áli de pysyqtaıyq, — dedi ákimdik ókili. 

Eske salsaq, Almatyda dúńgirshekten turǵyndardyń ashýyna tıgen jazýy alynyp tastalǵan bolatyn.